«Rodına» agrofırmasy» JShS óńirdegi jaýapty naýqandy qysqa merzimde aıaqtap, darqan dala tósindegi ózge áriptesterine úlgi kórsetti. Qazaqstannyń Eńbek Eri Ivan Saýer basqaratyn, 25 jyldyq tarıhy bar seriktestikte 46 myń gektardan astam alqaptyń astyǵy jınaldy. Oraqqa 63 aýyl sharýashylyǵy tehnıkasy qatysty, onyń ishinde zamanaýı 35 kombaın men 9 traktor bar. Gektar berekesi 19 sentnerden aınaldy. Keıbir qunarly alqaptardaǵy astyq shyǵymy 27 sentnerge deıin jetti.
«Egistikterdegi is-qımyldardyń úılesimi men jedeldigi qoıylǵan mindetterdiń sapaly oryndalýyna jaǵdaı jasap, egin orý ýaqytyn qysqartty. Egin jınaý jumystarynyń sátti aıaqtalýy óndiristi mehanıkalandyrýdyń nátıjesinde múmkin boldy», deıdi sharýashylyqtyń bas agronomy Qanat Ádilbekov.
Sharýashylyqta barlyǵy 43 myń tonnadan astam astyq bastyryldy, bul ótken, jyldaǵy kórsetkishten eki ese artyq. Agrofırma jyl saıyn jaqsy jumys istegen adamdardy yntalandyrady. 28 jyl eńbek ótili bar kombaınshy Fedor Merkýlov 1 515 gektar alqapty oryp, 3 030 tonna astyq bastyrsa, 39 jyl kombaın tizgindegen Iýrıı Gorodeskıı de 1 475 gektar alqaptan 2 950 tonna astyq bastyrǵan.
«Bıylǵy naýqanda 1 535 gektar alqaptyń eginin jınap, 3 070 tonna astyq bastyrdym. Men munda 27 jyldan beri jumys istep kelemin. Bıyl oraq kezinde aýa raıy qolaıly boldy», deıdi kombaıner Aleksandr Prohorov.
Alqaptaǵy astyqty qyrmanǵa tasymaldaýda júk kóliginiń júrgizýshisi Aleksandr Mıýsık top jardy. Ol naýqan bastalǵaly 10 700 tonna astyqty qambaǵa jetkizgen.
Sýbsıdııalaý túrindegi memlekettik qoldaý ónimdiliktiń joǵary deńgeıine qol jetkizýde erekshe ról atqarǵanyn atap ótken jón. Osy arqyly sharýashylyq janar-jaǵarmaı materıaldaryn, ósimdikterdi qorǵaý quraldary men mıneraldy tyńaıtqyshtardy satyp alý shyǵyndaryn edáýir tómendete aldy.
Bir aıta keterligi, bıylǵy eginniń berekesi gektaryna 13 sentnerden joǵary. Astyq saqtaıtyn kásiporyndar men elevatorlarda 148 astyq keptiretin qurylǵy jumys istep tur. Oraq jumystaryn júrgizýge arzandatylǵan baǵamen 80,3 myń tonna dızel otyny bólingen. О́ńir dıqandarynyń tabysy byltyrǵy mejemen salystyrǵanda qomaqty. Alty mln tonnadan astam astyq bastyrý mejelense, qazirdiń ózinde qut qambaǵa quıylǵan qyzyl dán bes mln tonnadan asty.
«Oblys elevatorlaryna túsken astyqtyń 60 paıyzdan astamy úshinshi klasty. Bul jaı astyqty naryqtyq baǵamen satýǵa múmkindik beredi», deıdi oblystyq Aýyl sharýashylyǵy jáne jer qatynastary basqarmasynyń basshysy Kenesh Álimjanov.
Bıyl mol astyq jınaǵan irgeli sharýashylyqtar az emes. Máselen, Bulandy aýdanynyń «Jýravlevka – 1» seriktestigi ár gektardan 57 sentnerden ónim jınady.
«Kóktemde 71 myń gektar jerge dándi jáne burshaq daqyldaryn sińirgen bolatynbyz, – deıdi «Jýravlevka – 1» seriktestiginiń bas dırektory Erlan Toqanov, – gektar berekesi 30 sentnerden aınalyp jatyr. Saralap qarasaq, jaqsy ónim alýǵa qajetti mıneraldy tyńaıtqyshtardy qoldanyp, agrotehnıkalyq sharalardy der kezinde júrgizýimiz sebepshi bolyp tur. Bıyl jekelegen alqaptardaǵy ónim tipti jaqsy. Baby kelisken alqaptardan 50 sentnerden astam ónim jınadyq».
Sandyqtaý aýdanyndaǵy «Maksımovskoe» seriktestiginde gektar berekesi 40 sentnerden assa, Zerendi aýdanyndaǵy «Dıhan plıýs» seriktestigi ár gektardan 33 sentnerden ónim jınap jatyr.
Aqmola oblysy
