Álemdik jáne dástúrli dinder lıderleriniń V sezine qatysýshylardyń deklarasııasy

Biz, adamzattyń jarqyn bolashaǵy úshin beıbitshilikke, kelisim men jasampaz yntymaqtastyqqa umtylyspen bas qosqan, Álemdik jáne dástúrli dinder lıderleriniń V sezine qatysýshylar, Qazaqstan Respýblıkasynyń Prezıdenti Joǵary mártebeli Nursultan Nazarbaev myrzaǵa Álemdik jáne dástúrli dinder lıderleriniń sezin ótkizý jónindegi ıgi bastamasy úshin, barsha Qazaqstan halqy men onyń Úkimetine keńpeıildik ári qonaqjaılyq tanytqany úshin alǵysymyzdy bildire otyryp, XXI ǵasyrda ádil ári qaýipsiz álemge qol jetkizý úshin dinaralyq jáne órkenıetaralyq únqatysýdy ilgeriletýdegi sezdiń joǵary rólin jáne Qazaqstan Respýblıkasynyń qosqan úlesin moıyndaı otyryp, dinaralyq jáne mádenıetaralyq úılesimdikti kótermeleý, din lıderleri men saıası qaıratkerler arasyndaǵy únqatysýdy nyǵaıtý jónindegi jahandyq jáne óńirlik bastamalardy qoldaı otyryp, álemdik jáne dástúrli dinderdiń rýhanı murattar men qundylyqtardy bekemdeý arqyly adamzat órkenıetin damytýǵa qosatyn úlesin atap kórsete otyryp, ózara qurmet ahýalyn qalyptastyrýdaǵy, otbasylyq qundylyqtardy nyǵaıtýdaǵy jáne jas býyndy ımandylyqqa tárbıeleýdegi dinniń mańyzdy rólin sezine otyryp,   dinaralyq jáne etnosaralyq shıelenistiń ósýine, saıası turaqsyzdyqqa jáne álemniń túrli óńirlerindegi áskerı qaqtyǵystarǵa alańdaýshylyq tanyta otyryp, beıbit halyqtyń qurban bolýyna jáne zardap shegýine ákelip soqqan tózbeýshiliktiń barlyq túrin, onyń ishinde dinı tózbeýshilik pen radıkalızm kórinisterin synǵa ala otyryp, barlyq dinderdiń shynaıy qyzmetine ekstremızm men terrorızmniń eshqandaı qatysy joq ekendigin basa aıta otyryp, V sezdiń «Din lıderleri men saıası qaıratkerlerdiń beıbitshilik pen damý jolyndaǵy únqatysýy» atty negizgi taqyrybynyń aıasynda qol jetkizilgen ýaǵdalastyqtardy iske asyrýǵa umtylysyn rastaı otyryp, tómendegiler týraly ýaǵdalasty: – din lıderleriniń saıası qaıratkerlermen, halyqaralyq uıymdarmen jáne azamattyq qoǵammen turaqtylyq pen qaýipsizdikti qamtamasyz etý, janjaldardy boldyrmaý jáne retteý maqsatyndaǵy únqatysýyna  járdem etýge; – áskerı janjaldar taraptaryn qaqtyǵystardy toqtatýǵa, bitimge kelýge jáne kelissózder arqyly zorlyq-zombylyqqa jol bermeýge, beıbit azamattardy qorǵaýǵa, barlyq qaıshylyqtardy beıbit jolmen sheshýge shaqyrýǵa; – ulttyq deńgeıde de, memleketaralyq deńgeıde de kez kelgen saıası jáne dinı qaıshylyqtardy kúshpen sheshý ádisinen túbegeıli bas tartýǵa; – barlyq aldyńǵy qatarly alyp memleketterdiń saıası lıderlerin qazirgi álemdegi senimsizdik tuńǵıyǵynyń tereńdeýin toqtatýǵa, bir-birine sanksııa qoldanýdy doǵarýǵa jáne beıbitshilik pen qaýipsizdikti ornatý maqsatynda halyqaralyq quqyqqa sáıkes Birikken Ulttar Uıymy men basqa da halyqaralyq uıymdardyń tetikterin qaıshylyqtardy retteýge paıdalaný úshin shaqyrýǵa; – dinı jáne saıası lıderlerdiń teńdik, ádildik, ózara qurmet jáne beıbitqatar ómir súrý qaǵıdattaryna negizdelgen únqatysýyna yqpal etýge; – turaqty beıbitshilik pen damý jolynda rýhanı jáne saıası lıderler arasyndaǵy ózara is-qımyldyń dástúrli tetikteriniń qyzmetin jandandyryp, jańa tetikter izdestirýge; – adamnyń ar-ojdan, pikir, sóz jáne tańdaý bostandyǵyna quqyqtarynyń ajyramastyǵyn túsine otyryp, álemdik jáne dástúrli dinderge, olardyń kıeli dep sanalatyn barlyq dúnıelerine jáne dindi ustanýshylardyń dinı sezimderine teń qurmetpen qaraýdy qamtamasyz etýge; – álemdik jáne dástúrli dinder arasyndaǵy únqatysýdy ilgeriletý kezinde dinı alýandylyqty qurmetteýge; – jalǵan dinı rıtorıkany jamylyp, arazdyqty, óshpendilik pen zorlyq-zombylyqty tutandyrýǵa baǵyttalǵan arandatýlar men áreket­ter­ge qarsy turýǵa; – terrorızm men ekstremızmniń tamyryna balta shabýǵa umtyla otyryp, olarǵa qarsy is-qımyl jasaýǵa, terrorızm men ekstremızmge qarsy kúrestiń dinderge jáne dindi ustanýshylarǵa qarsy baǵyttalǵan soǵysqa aınalyp ketpeýi úshin erekshe qyraǵylyq tanytýǵa; – beıbitshilik pen damý jolyndaǵy jahandyq dıalogty nyǵaıtý maqsatynda Álemdik jáne dástúrli dinder lıderleri seziniń Birikken Ulttar Uıymymen, qaýipsizdik jáne yntymaqtastyq salasyndaǵy halyqaralyq uıymdarmen jáne basqa da bastamalarmen ózara is-qımylyn odan ári damytýǵa; – dinı aǵartý isiniń, basqa dinderdi qurmetteýge tárbıeleýdiń, otbasylyq qundylyqtardy qadirleýdiń aspektilerine kóńil bóle otyryp, jastardyń bilim alýyn damytýǵa járdem etýge; – buqaralyq aqparat quraldarynyń ıeleri men shyǵarýshylaryna ózderiniń moraldyq jaýapkershiligin esterine sala otyryp, olardy, ınternetti qosa alǵanda, BAQ-ty dinaralyq jáne konfessııaaralyq alaýyzdyqty tutandyrý úshin paıdalaný praktıkasyn toqtatýǵa shaqyrýǵa, sondaı-aq, olarǵa beıbitshilik pen kelisim mádenıetin, dinder, halyqtar jáne memleketter arasynda qurmet sezimin nasıhattaýdy usynýǵa; – qazirgi álemniń kedeıshilik, ashtyq, epıdemııa, jumyssyzdyq, tabıǵı zilzala men tehnogendik apattar saldarymen kúres sııaqty anaǵurlym ózekti máselelerin sheshý úshin memleketter men qoǵamnyń  dinı jáne saıa­sı qaıratkerleriniń kúsh-jigerin biriktirýge; – Astanada Zorlyq-zombylyq ekstremızmine qarsy kúres jónindegi óńirlik konferensııa ótkizý týraly Qazaqstannyń bastamasyn qoldaýǵa; – Álemdik jáne dástúrli dinder lıderleriniń kezekti VI sezin 2018 jyly Astanada ótkizýge ýaǵdalasty. Qazaqstan Respýblıkasy, Astana qalasy, 2015 jylǵy 11 maýsym