Atalǵan dop dodasynyń alǵashqy kezdesýinde «Astana» Serbııanyń Bachka-Topola qalasynan kelgen TSS klýbymen kúsh synasty. Nebári 12 myń turǵyny bar shaǵyn ǵana shaharda jasaqtalǵan ujymnyń qurylǵanyna 111 jyl tolsa da, olar tek keıingi kezderi ǵana óreli ónerimen óz kórermenderin qýantyp júr. Atap aıtsaq, 2013/2023 jyldardaǵy maýsymda TSS Serbııanyń sýperlıgasynda qola medaldy ıelense, byltyrǵy chempıonatta kúmiske qol sozdy. Qazirgi kezde olar 9 oıynnan keıin 13 upaı jınap, jarys kestesinde 9-oryndy qanaǵat tutyp tur. Almatydaǵy matchqa qos komanda mynadaı quramda shyqty:
«Astana»: Chondrıch, Kazýkolovas, Marochkın, Amanovıch, Bartoles, Ebong, Grıpshı, Vorogovskıı, Tomasov, Chınedý, Kamara.
TSS: Ilıch, Stevanovıch, Djordjevıch, Petrovıch, Radın, Iovanovıch, Stanıch, Djakovas, Chırkovıch, Pantovıch, Banıas.
Báseke alma-kezek shabýylmen bastaldy. 15-mınýtta elordalyq klýbtyń oıynshysy Nazmı Grıpshıdiń buryshtamadan áýeletip bergen dobyn Iаn Vorogovskıı qaǵyp alyp, baǵytyn ózgerte bildi. Dál sol múmkindikti utymdy paıdalanǵan Kıpras Kazýkolovas ony baspen uryp qaqpaǵa sylq etkizdi. Gol! 1:0 esebimen «Astana» alǵa shyqty. Jyldam soǵylǵan goldan serbııalyqtar tez es jıdy. Jıi shabýyldap, Chondrıch qorǵaǵan qaqpany birneshe márte nysanaǵa aldy. Basqasyn aıtpaǵanda, 29-mınýtta Mılosh Pantovıch pen 42-mınýtta Ifet Djakovastyń qaqyrata tepken doptary mańdaıshaǵa tıgende, Ortalyq stadıonǵa jınalǵan jankúıerler siltideı tyndy. Abyroı bolǵanda qaqpamyz aman qaldy.
«Astananyń» da esepti eseleýge bir emes, birneshe múmkindigi boldy. Ýsman Kamara eki ret qaqpanyń dál aldynda turyp, dopty qısyq tepti. Degenmen báseke aıaqtalar tusta gvıneıalyq vınger mergendik tanytqan edi. Biraq Kamara oıynnan tys qalǵandyqtan, bul gol esepke alynbady. Sol aralyqta Aleksandr Chırkovıch taǵy bir márte dopty mańdaıshaǵa tıgizgenin de aıta ketken jón. Sóıtip, 1:0 esebi oıynnyń sońyna deıin saqtaldy. Endi Grıgorıı Babaıannyń shákirtteri kelesi kezdesýin 28 qazanda syrt alańda Ýelstiń TNS klýbyna qarsy ótkizedi.
