- Jeńil atletıkadan Qazaqstannyń týy astynda óner kórsetetin 28 jastaǵy kenııalyq legıoner Deızı Djepkemeı Fransııanyń Belfor qalasynda jalaýy jelbiregen jartylaı marafonnyń jeńimpazy atandy. Ol máre syzyǵyn 1 saǵat 07 mınýt 54 sekýndta qıyp ótti. Ekinshi, úshinshi oryndardy ýgandalyq Annet Chelangat (01:09:58) pen efıopııalyq Meselý Kahsaı (01:10:18) ıelendi.
- Fýtzaldan Tashkentte ótip jatqan álem birinshiliginiń jartylaı fınalynda Brazılııa men Ýkraına quramalar kúsh synasty. 18-mınýtta esepti Igor Chernıavskıı ashty. Ekinshi kezeń bastalǵan bette Rostıslav Semenchenko óz qaqpasyna dop soǵyp, qarsylas komandaǵy tarazy basyn teńestirýge múmkindik berdi. Kózdi ashyp-jumǵansha Dıego brazılııalyqtardy alǵa shyǵardy. 29-mınýtta Igor Korsýn jaǵdaıdy túzedi. Biraq 36-mınýtta Dıego dýbl avtory atanyp, Brazılııa quramasyna jeńis syılady – 3:2. Kelesi jartylaı fınalda Argentına men Fransııanyń fýtzalshylary sheberlik baıqasty.
- Fýtboldan «Aqtóbe» klýbynda oınaıtyn Freddı Gondola taıaý kúnderi Panama ulttyq quramasynyń sapyna qosylyp, aldaǵy joldastyq kezdesýlerde jasyl alańǵa shyǵady. Atalǵan memlekettiń bas komandasy 13, 16 qazan kúnderi AQSh pen Kanadaǵa qarsy oınaıdy. Sol saıystarda 29 jastaǵy «Aqtóbeniń» shabýylshysyna senim artylyp otyr.
- Dzıýdodan Dýshanbede ótip jatqan jastar arasyndaǵy álem birinshiliginiń ekinshi kúni Qazaqstannyń tatamı sheberleri óz jankúıerlerin qýanta almady. 73 kg salmaqtaǵy Ádilet Almat túrik Ibragım Demıreldi tize búktirgenimen, ile-shala ózbek Mardon Ravshanovqa ese jiberdi. Tusaýkeser kezdesýinde ulybrıtanııalyq Hloıa Lınkti súrindirgen Dana Ábdirova (57 kg) kelesi kezeńde ıtalııalyq Djýlııa Karnege jol berdi. Kórkem Orymbek te (63 kg) dál sol mejede toqtady. Ol qyrǵyz Myrzaıym Dıýshenbekovany qapy qaldyrǵanymen, koreıalyq Chjı Mın Iаnnyń osal tusyn taba almady.
- Bul kúnderi Malaızııada «Langkavı týry» dep atalatyn dástúrli jarys ótip jatyr. Sol kópkúndikte «Astana» klýbynyń veloshabandozdary tabysty óner kórsetti. Keshe besinshi kezeń óz máresine jetti. 197,3 shaqyrymdyq qashyqtyqty 3 saǵat 35 mınýt 30 sekýnda júrip ótken nıderlandtyq Arvıd de Klıaın («Tudor Pro Cycling Team») jeńimpaz atansa, ıtalııalyq Matteo Malýchellı («JCL Team UKYO») ekinshi oryndy ıelendi. Úshinshi satyǵa reseılik Gleb Syrısa («Astana») taban tiredi. Jalpy esepte Ulybrıtanııanyń ókili Maks Pýl («Team dsm-firmenich PostNL») kósh bastap keledi. «Astana» klýby músheleri arasynda eń úzdik kórsetkish Anton Charmıgke tıesili. Qazaqstanda irgetasy qalanǵan komandanyń sapyndaǵy danııalyq legıoner jetinshi orynda tur.
