Senat esepterdi qarady

Keshe Qasym-Jomart Toqaevtyń tóraǵalyq etýimen Parlament Senatynyń otyrysy bolyp, onda Qazaqstan Respýblıkasy Úkimetiniń jáne respýblıkalyq bıýdjettiń atqarylýyn baqylaý jónindegi Esep komıtetiniń 2014 jylǵy respýblıkalyq bıýdjettiń atqarylýy týraly esepteri qaraldy, dep habarlady palatanyń baspasóz qyzmeti. Depýtattardyń aldynda Qarjy mınıstri Baqyt Sultanov, Ulttyq bank tóraǵasy Qaırat Kelimbetov jáne Esep komıtetiniń tóraǵasy Qozy-Kórpesh Jańbyrshın baıandama jasady. Otyrysta atap ótilgendeı, jyl qorytyndysy boıynsha qarjylyq nátı­jeler teńgerimdelgen jáne bıýdjet túsim­deri 5 989 mıllıard teńge nemese túzetilgen josparǵa qaraǵanda, 99,4 paıyz bolyp qalyptasty. Respýblıkalyq bıýdjettiń 2014 jylǵa arnalǵan shyǵystary 7 070 mıllıard teńgeni nemese jospardyń 99,4 paıyzyn qurady. Tapshylyq bekitilgen deńgeıde – 1 081 mıllıard teńge. Esep komıtetiniń tóraǵasy Qozy-Kórpesh Jańbyrshın 2014 jylǵy respýblıkalyq bıýdjettiń atqarylýy týraly negizgi qorytyndyny aıta otyryp, bıýdjet qarjysyn tıimdi ári maqsatty túrde jáne nysanaly paıdalanýǵa qatysty ózekti máselelerge toqtaldy. Ol, sondaı-aq, respýblıkalyq bıýdjetti paıdalanýdy jetildirý jáne memleket aktıvterin basqarýda tıimdilikti arttyrý jónindegi usynystar aıtty. Esep qujattaryn talqylaý barysynda senatorlar E.Nyǵmatýlın, M.Baqtııaruly, Q.Aıtahanov, D.Qusdáýletov, A.Kúzekov, B.Elamanov, G.Kım, N.Orazalın, S.Ershov, E.Astaev, V.Bobrov, S.Nógerbekov, T.Muqashev, B.Beknazarov bıýdjettiń kiris bazasyn jetildirý, memleket aktıvterin basqarýdy jaqsartý, atqarýshylyq tár­tipterdi buzǵany úshin jaýaptylyqty arttyrý, qarjy monıtorıngi júıesiniń pármendiligi, salyq jáne keden ákim­shilen­dirýleriniń tıimdiligin kúsheıtý máse­lelerin kóterdi. Esep qujattaryn talqylaýdan keıin Senattyń qarjy jáne bıýdjet jó­nindegi salalyq komıtetine Parlament palatalarynyń 17 maýsymda bolatyn birlesken otyrysyna qosymsha baıandama ázirleý tapsyryldy.