Jankúıerler 48 kg salmaqtyń fınalyn taǵatsyzdana kútti. О́ıtkeni eki birdeı álem chempıony bas júldege talasýǵa tıis edi. Olar – Sanjar Táshkenbaı men Temirtas Júsipov. 36 jastaǵy Temirtasqa bul beles 2021 jyly Belgradta baǵynsa, 21 jastaǵy Sanjar byltyr Tashkenttegi dúbirli dodada daralandy. Biraq bastapqy básekelerde alǵan jaraqatyna baılanysty Táshkenbaı sharshy alańǵa shyqpady. Sóıtip, Júsipov judyryqtaspaı-aq jeńimpaz atandy. Sol sekildi Nursultan Altynbek pen Sáken Bıbosynov (54 kg), Sabyrjan Aqqalyqov pen Abylaıhan Júsipov (71 kg) syndy sańlaqtar arasyndaǵy fınaldyq saıystar ótpedi. Oǵan da ataqty boksshylardyń jaraqattanýy sebep boldy. Nátıjesinde, bas júlde Nursultan men Sabyrjanǵa buıyrdy.
51 kg salmaq dárejesiniń fınalynda Damır Ábdiqadyr men Danıal Sábıt kúsh synasyp, alǵashqysy jeńiske jetti. Bul báseke merziminen buryn toqtatyldy.
57 kg salmaqta Mahmud Sabyrhannyń top jaratynyna kúmándanǵandar kemde-kem edi. Alaıda ýaqyt ozǵan saıyn qarqyny kúsheıip kele jatqan Orazbek Asylqulov álem chempıonynyń aldyn orady. Ol tehnıkalyq ta, taktıkalyq turǵydan da áıgili qarsylasynan basym boldy. Kezinde О́zbekstannyń maqtanyshy, Olımpııa oıyndary men dúnıejúzilik dodada daralanǵan Abdýmálik Halokovty sabaǵan Orazbek úshinshi raýndta sol qolynyń soqqysymen Mahmudty sulatyp túsire jazdady.
60 kg salmaq dárejesinde Beıbarys Jeksenniń baǵy jandy. Sheshýshi shaıqasta ol álem, Azııa chempıonattarynyń kúmis júldegeri Serik Temirjanovty tize búktirdi. 63,5 kg salmaqta Ertýǵan Zeınýllınov erledi. Byltyr Azııa oıyndaryna qatysqan saqa sportshy fınalda Jandos Qydyrálini qapy qaldyrdy. 67 kg salmaqta Muhammedsabyr Bazarbaıulynyń mereıi ústem boldy. Fınalda onyń joly Ilıa Kalınınmen túıisti. Esimi kópshilikke beımálim boksshy sonyń aldynda ǵana álem chempıonatynyń fınalısi Dýlat Bekbaýovtan basym túsip, kópshilikti tańǵaldyrǵan edi. Bul joly olaı bolmady. Muhammedsabyr Ilıanyń erkin kósilýine esh múmkindik bermedi. 75 kg salmaqta Dıas Moljigitov top jardy. Fınalda ol Nurqanat Raıysty utty. 80 kg salmaqta Erasyl Jaqpekov jeńis toıyn toılady. Qandasymyz ýkraınalyq Nıkıta Zasenokpen judyryqtasty. Dneprdiń jaǵalaýynan kelgen osy jigit jartylaı fınalda tanymal boksshy Tursynbaı Qulahmetti qapy qaldyrǵan edi. Biraq Nıkıtanyń Dıasqa áli jetpedi.
86 kg salmaqta Bekzad Nurdáýletovke teń keler eshkim tabylmady. Kezinde álem chempıony atanǵan Bekzat keıinnen kásipqoılar arasynda kúsh synasty. Mine, endi, áýesqoılar rıngine qaıta oralyp, Qaraqozy Ábdálıevtiń týrnırinde óziniń myqtylyǵyn moıyndatty. Bas júlde jolyndaǵy tartysta ol Temirlan Muqataevtan basym tústi. 92 kg salmaq dárejesinde Saǵyndyq Toǵambaıdyń baǵy jandy. Fınalda ol tájirıbesi ábden tolysqan Abzal Kuttybekovten aılasyn asyrdy. Al +92 kg salmaqta Aıbek Oralbaıdyń sheberligine tánti boldyq. Kúni keshe ǵana asa aýyr salmaqqa aýysqan Aıbek aqtyq synda Nurlan Saparbaıdy san soqtyrdy.
