59 kg salmaqta synǵa túsken Nuraı Qazynabek fınalǵa deıin alqynbaı jetip, sheshýshi tusta ırandyq Aınaz Nasırımen sheberlik baıqasty. Qarsylasynyń boıy Nuraıdan 17 santımetrge bıik edi. Taekvondoda bul – úlken basymdyq. Desek te Nuraı onymen aıanbaı aıqasty. Birinshi kezeńde Parsy eliniń ókili tórt upaı alǵa shyqty. Úzilisten keıin jerlesimiz upaı sanyn edáýir qysqartty. Biraq báribir Nasırıdi qýyp jete almady. Nátıjesinde, 4:5 esebimen ese jibergen Qazynabek kúmis medaldy enshiledi. Kanadalyq Ella Brıýster men horvatııalyq Marııa Ýglegıch – qola júldeger.
55 kg salmaqta kúsh synasqan Nurálı Mahmut ta dál sol mejeden kórindi. Bastapqy básekelerdiń barlyǵyn óz paıdasyna sheshken ol jartylaı fınalda da jarqyn jeńiske jetti. Fınalda Nurálıdi de Iran taekvondoshysy toqtatty. Sóıtip, bas júldeni Sına Mohtaramıden jeńip alsa, qandasymyz kúmiske ıe boldy. Úshinshi oryndy reseılik Azat Besaev pen qytaılyq Haojan Tan ıelendi. 48 kg salmaqta saıysqa túsken jerlesimiz Temirjan Tasqyn ózbek Behrýz Salımovpen birge qola medalǵa qol jetkizdi. Bas júldeni ırandyq Mehdı Razmııan oljalasa, ıspanııalyq Haıro Trıgos kúmis medaldy enshiledi.
