Sýretti túsirgender – A.Dúısenbaev, E.ÚKIBAEV
Memleket basshysy sóz basynda elimizdegi oqý-aǵartý salasyn damytý jolynda júzege asyrylyp jatqan aýqymdy jumystarǵa toqtaldy.
– Meniń tapsyrmammen «Pedagog mártebesi týraly» arnaıy zań qabyldandy. Bul qujat ustazdardyń zańdy múddesi men quqyqtaryn qorǵaýǵa yqpal etti. Qazir muǵalimder men tárbıeshilerdiń jalaqysy aıtarlyqtaı kóbeıdi. Olar negizgi qyzmetine kedergi keltiretin artyq mindetterden bosatyldy. Osy zańǵa sáıkes «Qazaqstannyń eńbek sińirgen ustazy» ataǵy engizildi. Bul – jaı ataq emes, mártebeli memlekettik nagrada. Onyń ıegerine qomaqty syıaqy beriledi. Respýblıka boıynsha 46 muǵalim osy nagradaǵa ıe boldy. Sondaı-aq qazir ustazdarǵa akademııalyq dárejesine sáıkes ústemeaqy tólenip jatyr. Halyqaralyq olımpıada júldegerlerin daıyndaǵan muǵalimderge qarjylaı qoldaý kórsetiledi. Pedagog mamandyǵy boıynsha oqyp jatqan stýdentterdiń shákirtaqysy 2,5 ese kóbeıdi. Bıyl bolashaq ustazdardy daıarlaý úshin 16 myńǵa jýyq grant bólindi. Sonyń ishinde shamamen 1 800 «Altyn belgi» ıegeri pedagogıka mamandyǵyn tańdady. Bul – óte jaqsy úrdis, – dedi Prezıdent.
Qasym-Jomart Toqaev elimizde bilim salasyndaǵy úzdik mamandardy, ıaǵnı naǵyz kóshbasshylardy irikteý jobasy júzege asyrylyp jatqanyna toqtaldy. Qazirdiń ózinde atalǵan jobaǵa qatysqan 134 pedagog mektep dırektory bolyp taǵaıyndalǵan.
Buǵan qosa Prezıdent bilim sapasyn arttyrý, balalardy úılesimdi jáne jan-jaqty damytý úshin memleket tarapynan qolǵa alynǵan júıeli sharalarǵa nazar aýdardy.
– «Jaıly mektep» ulttyq jobasy aıasynda kelesi jyly 460 myńnan asa balaǵa arnalǵan 217 jańa mektep salý josparlanǵan. Olar zamanaýı talaptarǵa saı jabdyqtalǵan ozyq bilim oshaǵy bolady. Mektepterde erekshe qajettilikteri bar balalardyń kedergisiz bilim alýyna qolaıly jaǵdaı jasalady. Atalǵan aýqymdy joba úsh aýysymdy mektepter máselesin sheshýge, qala men aýyl mektepterindegi bilim alshaqtyǵyn azaıtýǵa múmkindik beredi. Buǵan qosa, elimizde jyl saıyn keminde myń mekteptiń ǵımaratyna jańǵyrtý jumystary júrgiziledi. Bilim berý úderisin sıfrlandyrýǵa basa nazar aýdarylady. Barlyq mektepti jyldamdyǵy joǵary ınternetke qosý boıynsha keshendi jumys qolǵa alynady. Qosymsha bilim berýge erekshe mán beriledi. Onyń aıasynda úsh mıllıonnan asa adamdy qamtý josparlanyp otyr. Bıyl otandyq mektepterdiń oqýshylary halyqaralyq olımpıadalardan 360-tan asa medal jeńip aldy. Bul – ustazdarymyzdyń jankeshti eńbegi men kásibıliginiń jemisi, – dedi Memleket basshysy.
Prezıdent ulaǵatty ustazdar tutas ultty tárbıeleıtinin atap ótip, jastardyń boıyna adal azamatqa tán qasıetterdi sińirý óte mańyzdy ekenin jetkizdi.
– Oqýshylardy bilimpazdyqqa, otanshyldyqqa, eńbekqorlyqqa baýlý qajet. Árıne, qazirgi zamanda bul ońaı sharýa emes. Keıingi kezde ınternettiń teris baǵyttaǵy shyrmaýyna túsken jastar kóbeıip ketti. Biz balalardy túrli qaterden qorǵaı bilýimiz kerek. Osyǵan baılanysty naqty sharalar qabyldanyp jatyr. Meniń tapsyrmammen «Birtutas tárbıe» atty arnaıy baǵdarlama daıyndaldy. Bul qujatta Ulttyq quryltaıda aıtylǵan usynys-pikirler eskerildi. Mektepterde ata-analardy pedagogıkalyq qoldaý ortalyqtary ashyldy, – dedi Memleket basshysy.
Qasym-Jomart Toqaev sanaly urpaq tárbıeleý isine ustazdarmen birge ata-analar da atsalysýy qajet dep sanaıdy. Bul oraıda Prezıdent muǵalimderdiń pandemııa, sý tasqyny kezinde oqý úderisin toqtatpaı, mindetin adal atqaryp, elge janashyrlyq tanytqanyn mysal etti.
– Muǵalimniń mártebesi qashanda bárinen bıik. Uly tulǵalardyń ózi ustazynyń aldynda shákirt bolyp qala beredi. Bir sózben aıtsaq, barsha jetistiktiń bastaýynda ustaz tur. Ulttyń bolashaǵy – ustazdyń qolynda. Meniń maqsatym – ustazdy qoǵamymyzdyń basty keıipkeri retinde dáripteý. Sebebi sizder bala oqytý arqyly keleshektiń kirpishin qalaısyzdar. Qazaqstannyń damyǵan el bolýyna zor úles qosyp júrsizder. Sizderdiń tabandy eńbekterińiz erekshe qurmet pen joǵary marapatqa laıyq, – dedi Prezıdent.
Memleket basshysy Qazaqstannyń túkpir-túkpirinde eńbegi eren muǵalimder jetkilikti ekenin atap ótip, aldaǵy ýaqytta olar da nazardan tys qalmaıtynyn aıtty.
– Ustazdar áýletine aıryqsha mán beriledi. Búgin men bilim berý isinde 350 jyl eńbek ótili bar Asylaevtar otbasy týraly maqalany oqydym. Olar Abaı oblysynda turady eken. Mundaı ónegeli áýletter elimizde kóp dep oılaımyn, – dedi Qasym-Jomart Toqaev.
Jıyn sońynda Memleket basshysy bilim berý isindegi asa úzdik jetistikteri jáne Qazaqstan Respýblıkasyna sińirgen aıryqsha eńbegi úshin bir top pedagogke «Qazaqstannyń eńbek sińirgen ustazy» ataǵyn tapsyrdy.
Is-sharada Qostanaı qalasyndaǵy Ybyraı Altynsarın atyndaǵy mamandandyrylǵan mektep-gımnazııa-ınternatynyń muǵalimi Aǵybaı Nuǵymanov, Aqtóbe qalasyndaǵy Álimhan Ermekov atyndaǵy №23 orta mektep-lıseıiniń muǵalimi Natalıa Penner sóz sóıledi.
