Qaırat Jamalıevtiń iri kólemdegi dúnıe-múlki qamaýǵa qoıyldy

ASTANA. 28 sáýir. Asa iri kólemde bopsalaý boıynsha aıyptalǵan kásipker Qaırat Jamalıevtiń dúnıe-múlki sot sheshimimen qamaýǵa qoıyldy. Bul týraly qylmystyq is boıynsha apellıasııalyq sot alqasynyń tóraǵasy Asqarjan Kenjegarınniń sózine silteme jasap, zakon.kz habarlady. 2015 jyldyń 25 sáýirinde Astana qalasy Esil aýdanynyń №2 aýdandyq soty tergeýshiniń ótinishin qarady. Onda Qylmystyq kodekstiń 194-baby, 4-bólimi, 2-tarmaǵy – kúsh qoldaný arqyly top bolyp bopsalaý boıynsha aıyptalǵan kúdikti Qaırat Jamalıevtiń dúnıe-múlkine tyıym salýdy sanksııalaý týraly aıtylǵan. Atalǵan ótinishti Esil aýdandyq prokýrory da qoldaǵan bolatyn. Bul baptyń sanksııasy boıynsha dúnıe-múlik tárkilenedi. Osy iske qatysty sotta: «Qazaqstan Respýblıkasy Qylmystyq is júrgizý kodeksiniń 161-baby 1-bólimine sáıkes, azamattyq talapty qanaǵattandyrý úshin úkimdi oryndaý maqsatynda sotqa deıingi tergeý júrgizetin tulǵa basqa da múliktik óndirip alý nemese dúnıe-múlkin tárkileý úshin dúnıe-múlikke tyıym salý sharasyn qoldanýǵa mindetti», – dep habarlandy. Nátıjesinde sot Jamalıevtiń «Lexus LX 570», «Mercedes Benz S500», Lamborghini Gallardo» markaly avtokólikterin, 821303, AAV 81012V tirkemelerin jáne jyljymaıtyn múlikteri – Astana qalasyndaǵy páteri men turǵyn úıin tutqynǵa alýdy sanksııalaý boıynsha qaýly shyǵardy. Eger kásipker kináli dep tanylsa, bul dúnıe-múlikter tárkilenedi. Apellıasııalyq tártip boıynsha bul qaýly kúdiktiniń shaǵymdaný merzimi aıaqtalǵanda kúshine enedi. Aıta keteıik, taıaýda Qaırat Jamalıevtiń uıymdastyrýymen úsh adam Álibı Jumaǵulov esimdi jas jigitti uryp-soqqany týraly derekter ǵalamtorǵa jarııalanǵan bolatyn. Áleýmettik jelilerde qyzý talqylanyp, halyqtyń nazaryn aýdarǵan bul isti elimizdiń Bas prokýrory men Ishki ister mınıstri óz baqylaýlaryna alǵany da belgili. Elaman Qońyr. Derek, sýret: zakon.kz.