Olar kóp talqysyna túsip, tańdaý jasalatyn AES taqyrybyn taǵy bir talqylaı kele, óz sheshimin belgileýge bel býdy. Solardyń biri jeke kásipker – Rahıma Qaıyrbekova.
«Referendýmnyń mańyzy zor. О́ıtkeni bul – eldiń bolashaǵyna qatysty sheshimderdi halyqtyń ózi qabyldaıtyn sát. Árbir daýys berýshiniń tańdaýy mańyzdy. Biz óz tańdaýymyz arqyly memleketimizdiń damýyna yqpal etemiz. Referendýmǵa qatysýǵa ózimniń azamattyq boryshym túrtki boldy. Halyqtyń tańdaýyn elemeý durys emes dep oılaımyn. О́z bolashaǵymyzǵa nemquraıdy qaraýǵa bolmaıdy», deıdi ol.
Zeınet jasyndaǵy ınjener-mehanık, Úlken aýylynyń turǵyny Sergeı Tretıakov bolsa: «Men úshin referendýmǵa qatysý – elimizdiń bolashaǵyna tikeleı áser etý múmkindigi. Bul – árqaısymyzdyń mańyzdy sheshimge qatysty óz pikirimizdi bildiretin sát jáne óz quqyǵymdy paıdalanyp, daýys bere alǵanyma qýanyshtymyn. О́zgeristerdi qalasaq, múddelerimiz eskerilsin desek, osyndaı sharalarǵa qatysýymyz kerek. Mańyzdy máselede shet qalýǵa bolmaıdy», degen oıyn ortaǵa saldy.
Daýys berýshiler qataryndaǵy tigin jáne toqý jabdyqtary boıynsha ınjener-mehanık, zeınetker Tatıana Vetrova referendýmǵa qatysyp, azamattyq ustanymyn bildirýge múmkindik bergen Memleket basshysy Qasym-Jomart Toqaevqa alǵysyn bildirdi.
Sondaı-aq bul kúngi is-sharada Qonaev qalasyndaǵy №949 daýys berý ýchaskesine kelgen Turyspek Dospanbetov aqsaqal jınalǵandarǵa aq batasyn berdi. Búkil sanaly ǵumyryn týǵan jerge arnaǵan qarııa boryshyn óteýge kelgen árbir jandarǵa aq tileýin jetkizdi.
Bul ýchaskede Almaty oblysynyń ákimi Marat Sultanǵazıev te daýys berdi. Mundaı is-sharalar qoǵam birligin saqtap, árbir azamatty eldiń saıası ómiriniń belsendi qatysýshysyna aınaldyratynyn aıtqan ákim saılaý ýchaskesine kelgen daýys berýshilerdiń barlyǵyna alǵysyn bildirdi.
El tarıhynda erekshe mańyzǵa ıe referndýmda Kegen aýdany Uzynbulaq aýylyndaǵy №573 referendým ýchaskesine bir áýlettiń bes býynynyń ókilderi kelip daýys berdi. 103 jastaǵy áz-ana Shortanova Kúlpara men onyń 80-nen asqan uly Marat Taqabaıuly, 50 jastaǵy nemeresi Oljas, 25 jastaǵy shóberesi Beıbit jáne 18 jastaǵy shóberesi Maral óz tańdaýyn jasady. Urpaqtar sabaqtastyǵy men yntymaq-birligin aıqyndaǵan otbasy músheleri el erteńi úshin aıryqsha mánge ıe sharadan shet qalmady. Arasyndaǵy 18 jasar Maral búgin alǵash ret daýys berdi.
Uıǵyr aýdanynyń jastary daýys berýge shyǵarmashylyq turǵyda qarap, azamattyq belsendilik tanytty. Shonjy aýylyndaǵy alańǵa bes ul men bes qyz ulttyq kıimmen kelip, merekelik kóńil kúı syılady. Jastardyń basty maqsaty – ózgelerdi el ómirine aralasýǵa tartyp, árbir daýystyń mańyzdy ekenin kórsetý boldy. Jarqyn kıim men jaqsy áser daýys berý úshin kelgenderdiń barlyǵyna umytylmas sát syılady.
Al Talǵar qalasynda jas jubaılar óz azamattyq mindetin oryndaýdy keıinge qaldyrmaýǵa sheshim qabyldap, neke qııý kúni daýys berý ýchaskesine bardy. Olar Panfılov aýylyndaǵy №880 ýchaskesine toı kıimderimen kelip, óz tańdaýyn jasady. Olardyń bul sheshimderi aýyl turǵyndary men daýys berý ýchaskesindegi komıssııa músheleriniń júzine jylý syılady.
Almaty oblysy
