foto Týrızm jáne sport mınıstrligi
Saltanatty is-sharaǵa Qazaqstan Respýblıkasy Týrızm jáne sport vıse-mınıstri Serik Jarasbaev, IBSA paýerlıftıng tóraǵasy Tınatı Revazashvılı jáne IBSA prezıdenti Ilkar Rahımov qatysyp, jarys qatysýshylaryna sáttilik tiledi.
«Búgin elimiz úshin aıtýly oqıǵa. Qazaqstanda tuńǵysh ret kórý qabileti tómen jáne zaǵıp jandar arasynda joǵary deńgeıdegi halyqaralyq jarys ótkizilip jatyr. Bul chempıonat ınklıýzıvti qoǵamdy jáne paralımpıadalyq qozǵalysty damytýdaǵy mańyzdy qadam. Osyndaı bastamalar elimizde paralımpıadalyq sporttyń, onyń ishinde para paýerlıftıngtiń qarqyndy damyp kele jatqanyn kórsetedi. Davıd Degtıarev pen Raýshan Qoıshybaeva sekildi sportshylarymyzdyń jetistikteri sonyń dáleli. Olardyń jeńisi jańa býynǵa úlgi bolyp, bolashaq chempıondarǵa jol kórsetip, shabyttandyryp keledi», dedi vıse-mınıstr.
Álemdik dodanyń alǵashqy kúninde A (48, 52, 56 kg) jáne B (60 jáne67,5 kg) salmaq dárejesindegi sportshylar synǵa tústi. Jahandyq dodaǵa Qazaqstan, Grýzııa, Ýkraına, Túrkııa, Lıvııa, Chehııa, Izraıl jáne Kenııa sportshylary qatysyp jatyr.
Álem chempıonatyn Qazaqstan Respýblıkasynyń Týrızm jáne sport mınıstrligi men Astana qalasy ákimdiginiń qoldaýymen Qazaqstannyń parapaýerlıftıng federasııasy, Qazaqstandyq zaǵıp sport assosıasııasy uıymdastyrdy.
Chempıonat 12-shi qazanǵa deıin jalǵasady.
