Kollajdy jasaǵan – Qonysbaı ShEJIMBAI, «EQ»
Batyr júrek ózine tyqyr taıanǵanyn sezse de qobaljymady. Aqyn júrek tek jaqsylyqtan úmittenip, jamandyqtyń bolaryna sener emes.
Qaraoıdaǵy jalǵyz úı kek qýǵan, sasyq pıǵylynyń qulyna aınalǵan dushpan jumsaǵan jandaıshaptar úshin alynbas qamal sekildi. О́ıtkeni úıdiń ishinde batyr otyr. Qarýyn kezenip barýǵa batyl júrek, jiger kerek. Al jandaıshaptar aılany qarý etti. Kúshtige jaǵynyp, sonyń qolynan jýyndy ishýdi kózdegen ıtterde erik-jiger, batyldyq qaıdan bolsyn?
Mahambet qapyda ketti. Qaraoıdyń qasıetti topyraǵyna aqynnyń qany tógildi. Asyldyń qany qabyrshaqtana qatqan Qaraoı qasiret mekenine aınaldy, bozaryp, kúńgirttendi.
Kúreskerdiń erligimen kelgen dańqyn tómendetý, ot aýyzdy aqynnyń ýytty óleńin óshirý múmkin emes ekenin san aılaly dushpany jaqsy biledi. Endi qaıtpek? Bir ǵana jol bar, ol – óltirý. О́ltirý arqyly esep aıyrysý. Bul – rýhy álsizdiń ǵana amaly... Osy amalǵa júginýdiń sońy qarǵys arqalaý, qarǵys estý, qarǵystyń astynda búrisip, tyrysyp, qorlyqpen kún keshý. Muny nápsi uqtyrsyn ba?
Mahambettiń bul dúnıedegi sońǵy kúni aı tutylǵan desedi... Máńgilik ómir bastaldy. Batyr úshin, aqyn úshin.
Mahambet erligimen de, óleńimen de, ólimimen de qazaqqa oı salyp ketti. Jattyń emes, jaqynyńnyń, qandasyńnyń, baýyryńnyń qolynan qaza tabýdyń aıanyshty, qorlyq, qasiret ekenin Qaraoı oqıǵasy qazaqqa máńgilikke eskertip tur. Bul eskertpeni esepke alar, oǵan eleń eter el bar ma?
Qaraoı. Kúz. Aspanda surǵylt bult syzdaıdy. Mysyqtabandap kelip «myqtylyǵyn» kórsetken satqyndyqtyń qasiretti tańbasy máńgilikke óshpesteı basylyp qaldy.
