Negizi osyǵan deıin WBO men IBF-tiń chempıony Jánibek Álimhanuly Domınıkan Respýblıkasynyń ókilin bir emes, birneshe márte jekpe-jekke shaqyrǵan edi. Biraq Karlos odan qaımyqty ma, álde basqa da sebebi bar ma, áıteýir úndemeı qutyldy. Mine, endi onyń qazaqtyń taǵy bir myqty boksshysymen kúsh synasatyny jaıynda aqparat bul kúnderi shartarapty sharlap júr.
Birden aıta keteıik, Adames te osal jigit emes. 30 jastaǵy Karıb teńizindegi aralda týyp-ósken dúldúl 2015 jyldan beri kásipqoı rıngte kúsh synasady. Sol aralyqta 25 ret sharshy alańǵa shyǵyp, 24 básekede jeńiske jetti. 18 qarsylasyn nokaýtqa jiberdi. Adamesten taıaq jegender arasynda Alehandro Barrera, Patrık Deı, Sergeı Derevıanchenko, Hýan-Masıas Montıel, Jýlıan Vılıams, Terrel Gaýsha syndy tanymal bylǵary qolǵap sheberleri bar. Ol óz karerasynda tek bir ret jeńilistiń kermek dámin tatty. Osydan týra bes jyl buryn domınıkandyq Brazılııanyń betkeustary Patrık Teısheıraǵa ese jiberdi.
31 jastaǵy Meıirim Nursultanov – 2013 jyly Almatyda ótken álem chempıonatynda qarsylas shydatpaǵan Mereı Aqshalovtyń týǵan inisi. Ol da kezinde áýesqoılar arasynda táýir nátıjege qol jetkizdi. 2010 jyly jastar arasynda Azııa, 2014 jyly eresekter arasynda Qazaqstan chempıony atandy. 2015 jyly Dúnıejúzilik boks serııasynda (WSB) bas júldeni oljalady. Janat Manashev pen Beıbit Esjanov syndy bilikti bapkerlerden tálim-tárbıe alǵan M.Nursultanov 2016 jyldan beri kásipqoılarmen kúsh synasyp keledi. Sol kezden beri 20 ret rıngke kóterilip, barlyq básekede basymdyq tanytty. 11 jekpe-jekti merziminen buryn aıaqtady.
Eger qos tarap ortaq mámilege kelse, Meıirimge bul tamasha múmkindik. Eń beldi nusqalarda ár jyldary Vasılıı Jırov, Beıbit Shúmenov, Gennadıı Golovkın, Janat Jaqııanovtyń álem chempıony atanǵanyn jankúıerler jaqsy biledi. Qazirgi kezde Jánibek Álimhanulynyń dańqy dúrkirep tur. Eger aldaǵy kúnderi M.Nursultanov Domınıkan Respýblıkasy ókilin utsa, onda altyn belbeýdi ıelengender tizimi taǵy bir qazaqtyń qaısar ulymen tolyǵady.
