Mamandar ekpindi jel órtti sóndirý jumysyn qıyndatqanyn aıtady. Tótenshe jaǵdaılar mınıstrliginiń baspasóz qyzmetiniń habarlaýynsha, 6 qazan kúni Qaraǵandy oblysy Qarqaraly aýdany Qoıandy aýylynyń mańynda qurǵaq shóp janǵan. О́rt ornyna orman sharýashylyǵynyń, tótenshe jaǵdaılar kúshteri men quraldary, erikti órtke qarsy qurylymdar dereý jiberilgen.
«Kúndiz dala órti Pavlodar oblysynyń shekarasynan «Baıanaýyl» memlekettik ulttyq tabıǵı parkiniń ormansyz aýmaǵyna aýysqan. О́rt ornyna «Qazavıaqutqarý» tikushaqtary bardy. Tikushaqtar sýdy Shalqarkól kólinen alyp, órt oshaqtaryna 6 ret, jalpy kólemi 18 tonna sý tókken. Sondaı-aq aerovızýaldy barlaý barysynda Jeltaý aýylynyń turǵyndaryn aldyn ala evakýasııalaý týraly sheshim qabyldandy. Qaýipsiz jerge 18 adam (8-i bala) evakýasııalandy. Tótenshe jaǵdaılar mınıstrligi komandalyq ortalyǵynda shtab jumys istep tur. О́rt ornynda Qaraǵandy, Pavlodar oblystary tótenshe jaǵdaılar departamentteriniń, JAO, ETRM kúshteri, jeke quramnan 183 adam, 56 tehnıka, 4 tikushaq jumyldyryldy. О́rttiń aldyn ala aýdany 3000 gektardan asty», dep málimdedi TJM.
Pavlodar oblysynyń ákimi Asaıyn Baıhanov tilsiz jaýdyń oqshaýlanǵanyn jetkizdi. О́rttiń zardaptaryn joıý jumystary jalǵasyp jatyr. О́ńirde qurbandar men zardap shekkender joq. О́rt shalǵan jerdiń aýmaǵy shamamen 10 myń gektarǵa jetip qalǵan. Jaǵdaı qalyń ósken shóptiń, sekýndyna 12–15 metr bolatyn ekpindi jeldiń saldarynan kúrdelengen.
«О́rt oshaqtaryn joıý ornynda óńirlik jedel shtab otyrysyn ótkizdim. Tilsiz jaýmen kúresýge barlyq qajetti kúshter tartyldy: 310 adam, 51 arnaıy tehnıka, 2 tikushaq, 3 ushqyshsyz basqarylatyn apparat jumys istep jatyr. Mundaı dala órtteriniń negizgi sebebiniń biri – shóp shabý kezinde qoldanylatyn tehnıkalardaǵy ushqyn sóndirgish qurylǵylardyń istemeýinen. Sondyqtan barlyq sharýa qojalyǵynan mindetti túrde ushqyn sóndirgish qurylǵylar bolýǵa tıis qoldanystaǵy tehnıkalardy tekserýdi, sondaı-aq óz sharýashylyqtary men úıleriniń, ásirese shóp qory saqtalatyn oryndardyń aınalasyn ýaqytynda jyrtýdy suraımyn», dedi A.Baıhanov.
Tótenshe jaǵdaılar mınıstri Shyńǵys Árinov keshe Pavlodar, Qaraǵandy oblystarynyń shekarasyndaǵy dala órtine qatysty sońǵy málimettermen bólisti. Mınıstrdiń aıtýynsha, órttiń jalpy aýmaǵy 45 myń gektarǵa jetken.
«Mınıstrliktiń búkil shtaby jumyldyryldy. Sondaı-aq Pavlodar oblysynda jedel shtab quryldy. Mınıstrlikten, sonymen qatar Abaı oblysynan, basqa da óńirlerden qosymsha kómek tartyldy. Qazirgi ýaqytta dala órti tolyǵymen oqshaýlandy, jaǵdaı baqylaýda», dedi Sh.Árinov Úkimet otyrysy aldynda.
О́rtke Qorǵanys mınıstrliginiń ushqyshtary da jumyldyrylyp, olar tikushaq arqyly bir táýlikte 36 tonna sý tókken.
Pavlodar oblysy,
Baıanaýyl aýdany,
Kúrkeli aýyldyq okrýgi
