Qazaq balalar ádebıetiniń klassıgi Berdibek Soqpaqbaevtyń 100 jyldyq mereıtoıy qarsańynda Bakýde «Meniń atym Qoja» kitabynyń tusaýkeser rásimi ótti. Túrki mádenıeti men murasy qorynyń qatysýymen ótken shara X Baký kitap jármeńkesi aıasynda uıymdastyrylyp otyr. Is-sharaǵa arnaıy qatysqan Prezıdent keńesshisi Málik Otarbaev romannyń eki el úshin de mańyzdy ekenin jetkizdi.
«Bıyl qazaqtyń belgili qalamgeri Berdibek Soqpaqbaevtyń týǵanyna 100 jyl tolyp otyr. Mereıtoı IýNESKO kóleminde atalyp ótiletin bolyp, arnaıy keshendi is-sharalar baǵdarlamasy ázirlendi. X Baký kitap jármeńkesi qarsańynda «Meniń atym Qoja» romany tuńǵysh ret ázerbaıjan tilinde jaryq kórip otyr. Soqpaqbaev shyǵarmalary ósip kele jatqan jetkinshekterdiń aqyl-oıyn jetildirýde, eki eldiń qarym-qatynasyn nyǵaıtýda basty ról atqarady», dedi ol.
Túrki mádenıeti men murasy qorynyń prezıdenti Aqtoty Raıymqulova romannyń 68 tilge aýdarylǵanyn, ótip otyrǵan eleýli is-shara túrki áleminiń baı murasyn saqtaý men bolashaq urpaqqa tabystaýǵa baǵyttalǵanyn tilge tıek etti.
Jazýshynyń qyzy Samal Soqpaqbaeva jınalǵan kópshilikke rızashylyǵyn bildirip, Memleket basshysyna alǵys aıtty.
«Ákem Berdibek Soqpaqbaevtyń mereıtoıyn tek elimizde ǵana emes, ózge de memleketterde keńinen atap ótý týraly bastamasy úshin Prezıdentimiz Qasym-Jomart Toqaevqa alǵysymdy bildiremin. Ázerbaıjan tarapyna qos halyqtyń birligin nyǵaıtatyn is-shara uıymdastyrǵany úshin erekshe alǵys aıtamyn», dedi ol.
Tusaýkeser rásimine kelýshiler qalamgerdiń jeke zattarymen, sondaı-aq ydys-aıaqtary jáne aksessýarlarymen tanysty. Munan soń Ázerbaıjan teatrynyń ártisteri «Meniń atym Qoja» romanynan úzindiler oqyp, kórermendi tánti etti.
