Sýret: ru.freepik.com
Irgedegi Jýaly aýdanyna qarasty Alataý aýylynyń turǵyny Názıra Baıdosovanyń otbasy da memleket qoldaýyn aıqyn sezinip otyr. Alaqandaı eldi meken «Aýyl amanaty» baǵdarlamasyna engen kezde bul otbasy qarap jatpaı, bilek sybanyp iske kiristi. Der kezinde qajetti qujatty ázirlep, Zeńgi baba túligin ósirýge nıet etti. «Eldar» jeke kásipkerligin ashqan olar ata kásip arqyly mol tabysqa keneletinine senimdi boldy. Nátıjesi kóp kúttirgen joq.
«Rasy kerek, eńbek etken adam tabysqa keneledi. Qazir «alma pis, aýzyma tús» dep jatatyn ýaqyt emes. Is bastaımyn degen otbasylarǵa memleket tarapynan túrli deńgeıde qoldaý kórsetilip jatqanyn kóz kórip otyr. Tek ár adamnyń boıynda kásipti dóńgeletip áketýge degen nıet bolsa jetkilikti. Otaǵasy Erkeulan Baıdosovtyń qoldaýynyń arqasynda jyl buryn «Aýyl amanaty» baǵdarlamasy arqyly jeńildetilgen paıyzben nesıe alýǵa nıet bildirip, qujat tapsyryp, tıesili qarajatty aldyq. Qolymyzǵa tıgen qarjynyń 7,5 mln teńgesine mal, qalǵan qarajatqa jemshóp aldyq. Osylaısha, jańa bir isti bastaýǵa bel býyp kiristik. Negizi, nesıe alýdyń óz krıterııleri bar eken. Onyń maqsaty men mindetin aýylymyzda júrgizilgen túsindirý jumystary kezinde tolyqtaı bildik. Otbasymyzdyń joba aıasynda nesıe rásimdeýine mamandardyń da kóp kómegi tıdi», deıdi N.Baıdosova máseleniń mánisine úńilip.
Aıtýynsha, nesıe alýǵa qujat ázirlemeı turyp, Baıdosovtar otbasy aldymen qora-jaıdy jańalaýǵa kirisipti. Qujat tapsyrǵan kezde mamandar mal ustaıtyn qora-jaıdyń talapqa saı ekenin eskergen kórinedi.
«Shyntýaıtyna kelsek, mamandar nesıe almaı turyp, qolǵa tıgen qarajatty maqsatsyz jumsaýǵa bolmaıtynyn eskertti. Memleket tarapynan jasalyp otyrǵan qamqorlyqty tek qana is bastaýǵa paıdalaný kerektigin tolyq túsindik. Bizge durys baǵyt-baǵdar bergen azamattarǵa alǵystan basqa aıtarymyz joq. О́ıtkeni sol kisilerdiń qoldaýy arqasynda áreketimizdiń túbinde berekesin bere bastaǵanyn sezdik», deıdi N.Baıdosova.
Alaqandaı Alataý aýylynan irgesin alystatpaǵan Baıdosovtar otbasy uıqyny dushpan dep tanyǵan. Olar túngi úshten bastap tirshiliktiń qamyna kirisedi. Otaǵasy Erkeulan men uldary maldyń jemshóbin ýaqtyly berse, Nazıra sıyr saýýǵa kirisedi. Keıde sıyr saýýǵa arnalǵan apparatty alma-kezek paıdalanyp, Zeńbi baba tuqymy óriske shyqqanǵa deıin tynymsyz eńbektenedi.
«Etken eńbek pen tókken ter óz nátıjesin berip jatyr. Kúndelikti tabysymyz barshylyq. Satyp alǵan sıyrlarymyz tóldedi. Alǵan tóldiń teń jartysyn satýdyń arqasynda nesıeniń bir bóligin tólep tastadyq. Mal sharýashylyǵyn bes saýsaǵyndaı jetik biletin mamandarmen udaıy baılanysyp turamyz. Sonyń arqasynda túrli aýrýdyń aldyn alamyz. Aýylymyz mal sharýashylyǵymen aınalysýǵa qolaıly. Jaıylym jerdegi shóp qunarly. Úı mańynda ózimizge tıesili jerimiz de bar. Jyl saıyn 3-4 gektar alqapqa arpa, bıdaı egip, ýaqtyly jemshóp daıyndaýdy qolǵa alyp jatyrmyz. Shynashaqtaı kezimizden úlkenderdiń tálimin alyp óstik qoı. Jasy egde kisiler baqyt pen baılyqtyń kilti eńbekte ekenin sanamyzǵa ábden quıdy. Uzaq jyl boıy bilim salasynda eńbek etip kelemin. Jumysym bar bolsa da, otbasymyzdyń mal sharýashylyǵymen aınalysqanyn qup kóremin. О́ıtkeni tórt túlik ósirý qanymyzda bar qasıet. «Aýyl amanaty» aýyl halqynyń tabysyn arttyrýǵa mol múmkindik týdyryp otyr. Aldaǵy ýaqytta taǵy bir kásipti ıgerip, tabysymyzdy arttyrsaq degen oıymyz bar», deıdi keıipkerimiz.
Joba aıasynda 2,5 paıyzdyq ústememen 8,5 mln teńge nesıe rásimdegen Baıdosovtar otbasy 18 bas saýyndy sıyr satyp alǵan. Aýyldaǵy qara shańyraqta úsh ul tárbıelep otyrǵan olar kúndelikti 180–190 lıtr shamasynda sút ótkizip, tabys taýyp otyr.
Jambyl oblysy,
Jýaly aýdany,
Alataý aýyly
