Aqmola oblysynda turǵyndardy qaýipsiz jerge kóshirýde

ASTANA. 29 sáýir. Aqmola oblysy Selınograd aýdany Orazaq aýyldyq okrýginde Nura ózenindegi bóget buzylyp, jergilikti halyq qaýipsiz jerge kóshirilýde. Oqıǵa 28 sáýirde saǵat 18:30-dar shamasynda bolǵan. Bul týraly «Interfaks-Qazaqstan» agenttigine silteme jasap, tengrinews.kz habarlady. Habarlamada aıtylǵandaı, bógettiń buzylý saldarynan Orazaq aýylynyń eski bóligin sý basqan. Ázirge qansha úı sý astynda qalǵany naqty belgisiz. Tilsiz jaý aýyldyń jańadan salynǵan bóligine jaqyndap keledi. Selınograd aýdandyq ákimdiginiń habarlaýynsha, jergilikti turǵyndardy shuǵyl qaýipsiz jerge kóshirý jumystary bastalyp ketken. Aýdannan osy maqsatta 8 avtobýs oqıǵa ornyna jiberildi. Alǵash bolyp 7 adamdy: qarııalar men aıaǵy aýyr áıelderdi evakýasııalady. Olar emhanadaǵy 20 adam úshin daıyndalǵan ýaqytsha panaǵa ornalastyryldy. Aýdan ákimi Malǵajdar Tátkeevdiń málimetine súıensek, Orazaq aýylynyń turǵyndary arasynda tasqynnan zardap shekken jáne qaza tapqandar joq. Aýdandyq ákimdiktiń málimeti boıynsha, atalǵan aýylda 400-den astam úı jáne 2 000-ǵa jýyq turǵyn bar. О́zen sýynyń kóterilýine baılanysty turǵyndardyń kóp bóligi bóget buzylǵanǵa deıin qaýipsiz jerge kóshirilgen. Búginde qalǵan turǵyndardy evakýasııalaý jumystary júrip jatyr. Tátkeevtiń aıtýynsha, qazirgi tańda aýyl turǵyndarynyń 70 paıyzy qaýipsiz jerge kóshirilgen. Elaman Qońyr. Derek, sýret: tengrinews.kz.