– Nesip aǵa, alaýger bolypsyz, qutty bolsyn!
– Aıtsyn. Alaý estafetasyna qatysatyn 29 adam Almaty qalasynyń ákimi Baýyrjan Baıbektiń qabyldaýynda boldyq. Aramyzda Olımpıada chempıondary Jaqsylyq Úshkempirov, Ermuhan Ybraıymov, Olga Shıshıgına, Dmıtrıı Balandın, Respýblıkalyq sport kolledjiniń dırektory Amalbek Tshanov, QazUÝ rektory Ǵalymqaıyr Mutanov, óner adamdarynan Sáken Maıǵazıev, Qaırat Nurtas sekildi elimizge belgili tulǵalar bar. Meni alaýgerler qataryna shaqyrýy sport jýrnalıstıkasyna degen qurmet dep bilemin. Munyń aldyndaǵy qysqy Azıadada da alaý alyp júgirgen bolatynmyn. Eńbegimizdi baǵalaǵany shyǵar…
– Siz qaı aralyqta júgiresiz?
– Seıfýllın kóshesi boıymen tómen qaraı Qazybek bı kóshesinen Tóle bı kóshesine deıin 200 metr júgirdim. Men 200 metr júgirgen kezde bir daryndy balanyń júreginde sportqa degen mahabbat otyn jaǵa alsam, bir maqsatqa jettim dep esepter edim. Qazaqstan boıynsha árbir alaýger bir balanyń sportqa degen yqylasyn týdyrsa, ıaǵnı 800 balanyń júreginde ot jaqsa, tamasha emes pe?!
– Ýnıversıada týraly oıyńyz qandaı?
– О́tken ǵasyrdyń 70-shi jyldaryndaǵy Seıdahmet Berdiqulov, Sultanǵalı Qarataev, Jaqsylyq Temirbekov aǵalarymyzdyń zamanynda biz mundaıdy armandaǵan da joqpyz. Qazaqstanda osyndaı sport ǵımarattary salynady, Azıada, Ýnıversıada ótedi degen úsh uıyqtasaq túsimizge kirmegen. Bul degen elimiz órkenıet kóshine ilesti degen sóz. Soǵan qýaný kerek. Keıbir keraýyz BAQ kóp aqsha ketedi, osynyń ne keregi bar dep saryýaıymǵa salynady. Men aıtar edim: ıá kóp aqsha ketedi, biraq bul bizdiń sportymyzdyń damýyna dúmpý, qozǵalys bolmaı ma? Qanshama sport nysandary salyndy, solardyń bári keleshekte el ıgiligi úshin jumys isteıdi ǵoı. Alataýymyz, «Medeýimiz», «Shymbulaǵymyz» bar, solardy álemge áıgileı bergennen utylmaımyz. Anda-sanda, jıyrma jylda bir úlken sport jarysyn ótkizbegende olardy ne isteımiz?
– Sizdińshe osy Ýnıversıadada Qazaqstan quramasynyń múmkindikteri qandaı?
– Árıne, Qazaqstan top jara qoımas, Italııa, Norvegııa, Reseı jáne basqa da qysqy sporty myqty elder bar. Biz úshtiktiń, bestiktiń ishine iliksek te úlken olja. Qazaq eliniń namysyn qashanǵy Smırnovtar men Kovalchýktar qorǵaıdy? Endi kezek ózimizdiń qyz-jigitterge keldi. Keshegi Sochıde júldege bir taban jaqyn bolǵan, búginde talaı dodalarda top jaryp júrgen short-trekshiler Aıdar Bekjanov, Nurbergen Jumaǵazıev, Abzal Ájǵalıev, Aslan Daýmov, frıstaılshy, álem chempıonaty men Álem kýbogynyń kúmis júldegeri Janbota Aldabergenova sııaqty daryndy sportshylarymyz bar! Solardy kórsetýimiz kerek, shashbaýyn kóterýimiz kerek. Jýrnalısterge aıtarym: Ýnıversıadanyń kóleńkesin emes, kúngeıin kórsetý qajet. Egemen elimizdi dáripteı bilýimiz kerek.
– Qazir ózińiz qaıda qyzmet isteısiz?
– Men qazir «Qazsport» telearnasynda kelisimshart boıynsha sarapshy-redaktorlyq qyzmettemin, telejýrnalısterdiń tili men stıliniń durys bolýyn qadaǵalaımyn, múmkindiginshe aqyl-keńesimdi berem. Til durys bolýy kerek, qazaqtyń kórkem tili sportta da ústemdik qurýy úshin eńbek etip jatqan jaıym bar.
– Áńgimeńizge rahmet! Qazaq eliniń sporttaǵy abyroıy arta bersin!
Qaırat ÁBILDINOV,
«Egemen Qazaqstan»
ASTANA
