«ImmuniGuide» medısınalyq startaby – ımmýndyq júıeni baǵalaýǵa arnalǵan biregeı platforma. Nurlybek О́derbaev pen Igor Ponamarev syndy bilikti mamandar ázirlegen osy ınnovasııalyq ónim onkologııalyq klınıkada sátti iske qosyldy. Innovasııalyq medısına ǵylymı-klınıkalyq ortalyǵy dárigerlerinen quralǵan toptyń aıtýynsha, jobanyń negizgi maqsaty – halyqqa tegin ári qoljetimdi skrınıng usyný. Platforma jalpy qan saraptamasynyń nátıjelerine negizdelgen ımmýnologııalyq derekterdiń keń aýqymyn qamtıdy. Jasyryn ınfeksııalardy anyqtap, organızmniń aýrý-syrqaýǵa, ekpege, fızıkalyq júktemeler men streske áserin baqylaýǵa kómektesedi. Sonymen qatar ımmýnıtetti qalypta ustap, nyǵaıtýǵa qatysty usynymdar beredi.
«Oıymyzda jobanyń alǵashqy ushqyny 2016 jyly paıda boldy. Sodan beri platformany ázirleýge 8 jyldan astam ýaqyt jumsadyq. Osy aralyqta 4 avtorlyq quqyq alyp, saýda markasyn tirkep qana qoımaı, platformanyń qurylymyn qaıta qarap, jasandy ıntellektini kiriktirdik. Bıyl shildede ónim óndiriske sátti engizildi, belsendi qoldanyp jatqan klınıkalar men emhanalarda jaqsy kórsetkishter baıqalady. Platforma usynǵan nátıjelerdiń dáldigi ortasha eseppen 98,7%-dy quraıdy», deıdi «ImmuniGuide» negizin teń qalaýshy, medısına ǵylymdarynyń doktory, dáriger-onkolog Nurlybek О́derbaev.
Jobanyń basty artyqshylyǵy – medısınalyq derekterdi joǵary jyldamdyqpen, dáldikpen óńdeı alatyn jasandy ıntellektiniń kirigýinde. Bul – egjeı-tegjeıli jekelendirilgen esepterdi kez kelgen tilde usynýǵa múmkindik beredi. Ǵalymdar densaýlyq saqtaý salasyn damytýǵa septesetin otandyq ónimderin halyqaralyq alańǵa shyǵarýǵa daıyn. Onyń ústine joba sheteldikterdiń de qyzyǵýshylyǵyn týdyryp úlgergen. Mysaly, qazirde Malaızııa tarapymen platformany sol aımaqta synaqtan ótkizý jóninde kelissózder júrgizilip jatyr. Alda ǵalymdar tehnologııa aıasyn keńeıtip, ony Azııaǵa ǵana emes, Eýropa men AQSh elderine jetkizýdi kózdep otyr.
