Memleket aınasy

Ortalyq kommýnıkasııalar qyzmetinde «Kásibı memlekettik apparatty qalyptastyrý» taqyrybynda brıfıng ótti. Oǵan Prezıdent janyndaǵy Memlekettik basqarý akademııasynyń professorlary Jańyljan Júnisova men Láıla Asylbekova qatysty. Spıkerler memlekettik qyzmet salasyn ýaqyt talabyna saı jetildirýdiń kún tártibine shyǵarylýy el damýyna jańasha serpin beretinin aıta kelip, qazirgi tańda osy baǵytta atqarylyp jatqan sharalarǵa toqtaldy. Jıyn barysynda Láıla Asylbekova: – Kásibı memlekettik apparatty qurý úshin eń aldymen memlekettik qyzmetshiniń jaǵymdy kelbetin qalyptastyrý qajet. Máselen, memlekettik qyzmetkerdiń boıynda maqsatqa jetsem degen talpynýshylyq, minez-qulyq ádeptiligi, yntymaqtastyq, uıymdastyrýshylyq daryn, básekege qabilettilik, jan-jaqtylyq, beıimdelý men baǵdarlaý qasıetteri bolǵany jón. Mundaı baǵalaý talaby «A» korpýsymen qatar «B» korpýsyna iriktelýde synalatyn úmitkerlerge de qoıylady, – dedi. Sondaı-aq, ol Prezıdent janyndaǵy Memlekettik basqarý akademııasynyń oqytý baǵdarlamasy turǵysynda sóz ete otyryp, azamattardyń biliktilik tájirıbesin, minez-qulyq ádeptiligin jáne ózara tú­sinistik qaǵıdatyn biriktire oqytý mem­lekettik qyzmet júıesinde oryn alatyn jemqorlyqtyń aldyn alýǵa sep bolady ári qyzmetshiniń jeke qasıetteriniń deńgeıin synaýǵa múmkindik beredi dep esepteıtinin jetkizdi. Brıfıngte spıkerler Memleket basshysy Nursultan Nazarbaev usynǵan «Máńgilik El» ulttyq ıdeıasy Qazaqstan halqynyń bolmysyna tolyqtaı sáıkes keletini jóninde de áńgimelep berdi. О́z kezeginde Jańyljan Júnisova: – Kez kelgen eldiń damýy úshin sol halyqtyń eń jaqsy qasıetterin biriktiretin jáne oǵan sáıkes keletin, alǵa bastaıtyn bir ıdeıa qajet. Mysaly, «Amerıka armany» bizge jaramaıdy, sebebi, onyń negizi qazaqstandyqtarǵa tán emes. Bizdiń dilimiz de, salt-dástúrimiz de basqa, – dedi. Onyń aıtýynsha, «Máńgilik El» ıdeıasynda azamattyq teńdik, eńbekqorlyq, ǵylymǵa degen qushtarlyq, toleranttylyq, ádildik, otansúıgishtik sekildi taza qazaqstandyq rýhanı qundylyqtar óte jaqsy úılesim tapqan. Basqosýda belgili bolǵandaı, «Nur Otan» partııasynyń Qoǵamdyq saıasat ınstıtýty jaqynda azamattyq birtektilik týraly saýalnama júrgizipti. Suraý salynǵandardyń 70 paıyzy ózderin, eń aldymen, Qazaqstan azamattary retinde sezinetinin aıtqan. Bul – asa joǵary kórsetkish. Joldybaı BAZAR, «Egemen Qazaqstan».