«Ertis gıdrometallýrgııalyq kombınaty» JShS – «Solidcore Resources» (burynǵy ataýy – «Polymetal») halyqaralyq altyn óndiretin kompanııanyń bolashaqqa baǵyttalǵan jobasy. Onyń aıasynda avtoklavty totyqsyzdandyrýdy qoldaný arqyly aıryqsha tózimdi, quramynda altyny bar konsentrattardy qaıta óńdeý boıynsha ámbebap keshendi salý múmkindigi qarastyrylyp otyr. О́ńdeý úderisiniń qorytyndy kezeńi – dore qorytpasy. Mamandar bolashaq kombınat Ortalyq Azııada balamasy joq biregeı gıdrometallýrgııalyq óndiriske aınalady dep boljaıdy.
«Negizi dore qorytpasyn alý óte kúrdeli tásilderden turady. Konsentrattardy aıyryp alýdy qarapaıym tilmen túsindirip kóreıin. «Tózimdi» kenderde, konsentrattarda mıkrondy altyn sýlfıdtarǵa (mıneraldar — pırıt pen arsenopırıtke) kapsýldanǵan. Mundaı altyn usaqtaý úderisin qansha júrgizseńiz de, nashar aıyrylady. Quramynda kómirtek bar qosymsha zattarǵa qatysty «eki márte tózimdi» termınin qoldanamyz. Sebebi bul jaǵdaıda altyn kómirtekpen ustalyp qalýy múmkin. Sondaı-aq bul altyndy aıyryp alý kezinde onyń úlesiniń tómendeýine ákeledi. Bizdiń kombınattyń jobalyq sehy sýlfıdti mıneraldardy joǵary temperatýrada jáne qysymda ottegimen buzýǵa negizdelgen, ıaǵnı avtoklavty totyqsyzdandyrý jáne sińdirip, siltisizdendirýdiń gıdrometallýrgııalyq tehnologııasy tańdaldy. Tehnologııa qorshaǵan ortaǵa áserdi tómendete otyryp, ártúrli zattyq quramdaǵy sýlfıdti materıaldarmen jumys isteýge, joǵary óndirý deńgeıi bar ártúrli ken oryndarynan alynǵan joǵary kómirtekti «eki márte tózimdi» sýlfıdti konsentrattardy tıimdi qaıta óńdeýge múmkindik beretin ámbebap erekshelikterdi qamtıdy. Al avtoklavty totyqsyzdandyrý – tózimdi kenderdi qaıta óńdeýge arnalǵan álemdegi ekologııalyq turǵydan eń qaýipsiz tehnologııa. Joba ınvestory – «Solidcore Resources», ınvestısııa somasy shamamen 800 mln dollar», deıdi «Ertis gıdrometallýrgııa kombınaty» JShS bas dırektory Arman Beısembınov.
О́ndiris orny «Pavlodar» arnaıy ekonomıkalyq aımaǵynda ornalasady. Keleshekte oblys ekonomıkasyna eleýli paıda ákeledi dep kútiledi.
«Zamanaýı joǵary tehnologııalyq óndiris shamamen 500 jumys ornyn qurýǵa múmkindik beredi. Budan bólek, kombınattaǵy birqatar úderisti qamtamasyz etýge merdigerlik uıymdardy tartý josparlanǵan. Al bul óz kezeginde qosymsha jumys oryndaryn ashýǵa jaǵdaı týdyrady. «Solidcore Resources» kompanııasy ózi ornalasqan aýmaqtyń áleýmettik turaqtylyǵyn qoldaý maqsatynda ınvestısııa quıýǵa da árdaıym yntaly. Toptyń Qostanaı men Abaı oblystaryndaǵy kásiporyndary birneshe jyl boıy aımaqtardyń áleýmettik-ekonomıkalyq deńgeıin jaqsartý jumysy nátıjeli júrgizip kele jatyr. Jańa sport zaldary ashyldy, kópbalaly otbasylarǵa baspanalar satyp alyndy, medısınalyq jabdyqtar men medıkamentter satyp áperildi. Eldi mekenderdegi baqtar abattandyrylyp, shalǵaıdaǵy aýyldar ınternetpen qamtamasyz etildi. Osy tarapta Ertis-Baıan óńiri de nazardan tys qalmaıtyny anyq. «Solidcore Resources» áleýmettik saladaǵy oń tájirıbesin jalǵastyrýdy kózdep otyr», dedi A.Beısembınov.
Qazir «Pavlodar» arnaıy ekonomıkalyq aımaǵynda kompanııanyń atyna jer paıdalaný quqyǵy resimdelgen. Avtoklavty jetkizý is-sharalary bastalyp, elektrmen, sýmen jabdyqtaý tehnıkalyq sharttary alyndy. Kombınat ókilderi ınjenerlik ınfraqurylym men júretin joldar úshin qosymsha jer ýchaskelerin resimdeý jumysy júrgizilip jatqanyn aıtady. Sehtyń naqty qashan salynyp bitetini ázirshe beımálim.
Arnaıy ekonomıkalyq aımaqta jumysyn bastaǵan óndirister múlik, jer salyǵynan, keden bajynan, sondaı-aq korporatıvti tabys salyǵy men qosymsha qun salyǵynan bosatylady.
Pavlodar oblysy
