Astana qalasynyń memlekettik arhıvi uıymdastyrýymen qazaqtyń kórnekti aqyny, jazýshy, memlekettik qaıratkeri, Qazaq AKSR Halyq Komıssarlary Keńesiniń alǵashqy tóraǵasy Sáken Seıfýllınniń týǵanyna 130 jyl tolýyna arnalǵan «Qazaq ádebıetiniń aqsunqary» atty dóńgelek ústel ótti.
Is-sharada alǵashqy bolyp sóz alǵan S.Seıfýllın mýzeıiniń dırektory, belgili ǵalym Marat Ábsemetov jıynnyń mańyzdylyǵyna toqtaldy.
– Búgin erekshe kún, Sáken babamyzdyń on qujatyn memlekettik arhıvke tapsyrǵaly otyrmyz. San qyrly tulǵa jóninde júzdegen qujat bar, búgin solardyń alǵashqy legin ákeldik. Aqmola óńiri Sákenniń kóp ómiri ótken jer, osynda ol jas kúninde qazaq-orys tilinde bilim aldy, asaýdaı alqynǵan jyldaryn ótkizdi. Búgin Sákenniń sırek qujattarymen birge bizdiń mýzeı shyǵarǵan on tomdyǵyn usynyp otyrmyz. Onynshy tom túrik tilinde, Túrkııanyń Egeı ýnıversıteti aqynnyń «Asaý tulparyn» zerttep, ony qyzmetkerimiz Alýa Toqtarbaeva monografııa qylyp jazyp shyqty. Mine, osy qundy jádigerlerdi sizderge qurmetpen usynamyz,–dedi ol.
S.Seıfýllın atyndaǵy Qazaq agrotehnıkalyq zertteý ýnıversıtetiniń tarıh kafedrasynyń meńgerýshisi Aınur Alıakbarova mereıtoı qarsańynda jańa kitap ázirlep otyrǵandaryn jetkizdi.
– Bıyl Sáken atamyzdyń 130 jyldyǵyna bizdiń ýnıversıtette jyl boıy kóptegen is-shara bolyp ótti. Jastarǵa aqynnyń esimin tanytý maqsatynda ýnıversıtetter arasynda ıntellektýaldyq oıyndar ótkizip, jas jetkinshekterdiń tulǵatanýdaǵy aıaq alysyna qýandyq. Osy arqyly urpaqty ultqa qyzmet etýge, zııalylyqqa tárbıeleýge úndep otyrmyz. Bıyl mereıtoı qarsańynda úsh tilde «Sáken joly» atty kitapty ázirledik. Kitapqa arhıvtiń hám murajaıdyń kóp eńbekterin qoldandyq, aldaǵy ýaqytta kópshilikke keńinen tanystyramyz, – dedi Aınur Pernebekqyzy.
Atalǵan is-shara barysynda Sáken Seıfýllın haqynda derekti fılm kórsetilip, aqynnyń shyǵarmashylyq, qaıratkerlik qyrlary kórinis tapty. Astana qalasy memlekettik arhıviniń dırektory Jangeldi Bımoldın tarıhı tulǵa týraly derekterdi júıeleý jáne qoljetimdiligin arttyrý maqsatynda Sáken Seıfýllınge qatysty qujattardy qabyldaýǵa daıyn ekenin jetkizdi.
