Maıra Muhamedqyzy kórermenderge álemdik jáne ulttyq repertýardaǵy týyndylardan turatyn biregeı baǵdarlama usyndy. Opera sańlaǵynyń oryndaýynda Rıhard Shtraýs, Ferens Lıst, Petr Ilıch Chaıkovskıı syndy uly kompozıtorlardyń operalarynan arııalar, sondaı-aq konsertke erekshe ulttyq boıaý bergen qazaq avtorlarynyń shyǵarmalary shyrqaldy. Dırıjerler Abzal Muhıtdın jáne Mádı О́mirzaqtyń jetekshiligindegi «Astana Opera» sımfonııalyq orkestriniń jáne horynyń súıemeldeýimen ótken konsert onyń kóp jyldyq shyǵarmashylyǵynyń jandy kórinisine aınaldy.
Aıryqsha atap ótetin nómir — Maıra Muhamedqyzynyń AQSh-taǵy eski dosy Temirjan Erjanovpen birge oryndaǵan «Olieb, solang duliebenkannst» kompozısııasy kórermenderdiń zor yqylasyna bólendi. Maıra Muhamedqyzynyń Jorj Bıze, Sharl Gýno jáne Djýzeppe Verdıdiń operalarynan arııalardy tebirene oryndaýy onyń emosııalyq tereńdigin jáne ártistik sheberligin aıqyn kórsetti. Sondaı-aq sımfonııalyq orkestr men hordyń súıemeldeýimen oryndalǵan Karl Orftyń «Karmına Býrana» shyǵarmasynyń «O Fortuna» úzindisinen keıin de kórermender dý qol shapalaq jaýdyrdy.
Maıra Muhamedqyzynyń mansap joly — bul tek sahnadaǵy 30 jyl ǵana emes, bul ónerge degen adaldyqtyń 30 jyly. Qazaqstan Respýblıkasynyń eńbek sińirgen ártisi, kóptegen syılyqtardyń laýreaty jáne bedeldi marapattardyń ıegeri retinde ol birneshe jyl boıy qazaq opera ónerin álemdik arenada tanystyrdy. Ol aıryqsha sheberligi, jarqyn harızmasy jáne óz isine degen adaldyǵynyń arqasynda Qazaqstanda ǵana emes, odan tys jerlerde de kórermenderdiń mahabbaty men yqylasyna ıe boldy.
Rejısseri Mıhaıl Pandjavıdze bolǵan konsertke teatrdyń balalar hory, «Astana Operanyń» jetekshi balet solısteri Ánel Rústemova, Oljas Tarlanov, Dıas Qurmanǵazy, áıgili qazaqstandyq ártister Oraz Muhamedıar (tenor), Jumabek Qańtarbaev (tenor), Aıbek Qanatbek (barıton), Ramına Satybaldy jáne taǵy basqalary qatysty.
Saltanatty kesh «Domalaq Ana» operasynan (T.Jarmuhamet) toı kórinisimen aıaqtaldy. Osy keshtiń sońǵy notasy osy biregeı mádenı oqıǵanyń kýágeri bolǵandardyń esinde uzaq saqtalary sózsiz.
