Sýretterdi túsirgen – avtor
Salbýryn saıyn aspan serisin qolǵa qondyrǵan babalardyń kóregendigine tańǵalyp, bas shaıqaı beremiz. Saptama etik, qasqyr ishik, kúmis beldik taǵyp, sán-saltanatpen alshań basyp kele jatqan qusbegilerge qarap, kóz toıady. Bul bekzat ónerge sheteldikterdiń de tań-tamasha bolyp júrgenin kórdik. Aıtqandaı, qustaryn alyp, sonaý Majarstan, Qytaı, Qyrǵyzstan, Mońǵolııa memleketterinen de sportshylar qatysty. Iá, bul da – ulttyq sporttyń bir túri. Keshegi kóshpeliler oıyndarynyń jalǵasy ispetti.
Búrkittóbeniń bergi betine oblystyń ár aýdany, iri mekemeleri qaz-qatar kıiz úılerin tigip, ishin aýdandaǵy mańdaıaldy sheberlerdiń qolynan shyqqan buıymdarmen toltyrdy. Qazan kóterip, aq dastarqandaryn jaıdy. Kireberisinde kúı kúmbirletip, án áýeletti. Alańnyń qaq ortasyna alty qanat aq ordadaı úlken kıiz úı jáne qoıyldy. 500 oryndyq kıiz úı ishinde ónerpazdar án salyp, ánsúıer qaýym tamsanyp jatty. Sonaý Almatydan Nurlan Abdýllın, Qýandyq Rahym syndy estrada juldyzdary óner kórsetti.
Alańnyń tór jaǵynda sadaqty sánge tartyp júrgen sur mergender de baq synasty. Saıahatshylardyń biri atpen serýendese, endi biri kvadrosıkl minip, bel-belesti aınalyp kelip jatty. Salbýrynda ıt júgirtip, ań aýlap júrgen saıatshylar da tazylarynyń baýyryn bir jazyp, jarysqa qosty. Iriktelgen búrkitshiler sheshýshi saıysta qyrandaryn túlkige saldy. Tartysty dodaǵa 80 búrkit, 30 suńqar qatysqan.
«Úlken is-shara bolǵandyqtan, bárin durys oılastyrýǵa tyrystyq. Jıyrma shaqty kıiz úı quryldy. Búrkitshiler baıqaýyna belgili kásipker Muhtar Toıbazarov ózindik qoldaýyn kórsetip otyr. Basqa da demeýshi bolǵan kásipkerler bar. Olarǵa alǵys bildiremiz», dedi ShQO ákiminiń orynbasary Erbol Nurǵalıev.
Kún jańbyrly bolǵanymen, jınalǵan jurt ortadaǵy 500 oryndyq kıiz úıdi qalqalady. Konserttiń sońy aıtysqa ulasyp, aqyndar sahnaǵa kóterilgen. Bul ýaqytta atbegiler asaý úıretýden synǵa túsip jatty. Jylqy dese delebesi qozatyn kórermen jaýǵan jańbyrǵa da qaraǵan joq. Qıqý qosyp, taqym qysyp turdy.
Bıylǵy týrnırdiń taǵy bir ereksheligi – halyq qustyń ushýyn ǵana qyzyqtaǵan joq, Búrkittóbedegi atmosferanyń ózi merekelik kóńil kúı syılap turǵan. Alaıda búrkitshiler úshin jerdiń geografııalyq orny birqatar qıyndyq týǵyzǵan kórinedi.
«Qazir tehnologııanyń damyǵan ǵasyry ǵoı. Uıymdastyrýshylar aldyn ala kún raıyn boljasa durys edi. Buryn aýa raıyn qarııalarymyz aıdyń tolǵany, úıirilgeni, aıdyń toǵysýy dep boljap otyra-tuǵyn. О́tkizilgen orny da qolaısyzdaý. Byltyr jel kóterip, búrkitti toqtatpaı qoıǵan. Bul jerdiń tórt qubylasynan da jel soǵyp turady. Neshe jyldan beri sony baıqadyq. Sondyqtan aldaǵy jyldary dástúrli týrnırimizdiń uıymdastyrylýyn qaıta bir pysyqtaý kerek», deıdi belgili búrkitshi Táttimbet Kápuly.
Halyqaralyq deńgeıde ekinshi jyl ótip otyrǵan festıvaldyń jyl saıyn salmaǵy artyp, kórermen qarasy kóbeıip kele jatqanyn kóz kórip otyr. Dástúrli týrnırdi jyl saıyn oblys ákimdigi men Qusbegilik federasııasy da jańǵyrta berýge nıetti.
«О́zderińiz bilesizder, Prezıdentimiz kóshpeliler oıyny – kóshpelilerdiń olımpıadasy dedi. Qusbegiler saıysy joǵary deńgeıde uıymdastyrylyp jatyr. Shyǵys salbýryny – Kóshpeliler oıyndarynan keıingi óte joǵary deńgeıde uıymdastyrylǵan is-shara. Kún raıynyń qolaısyzdyǵyna qaramastan, bes myńǵa jýyq kórermen jınaldy. Shetelden kelgen qonaqtar ónerimizge, rýhanııatymyzǵa tánti bolyp jatyr. Qusbegiler atynan Shyǵys Qazaqstan oblysy ákimdigine rızashylyǵymyzdy bildiremiz», dedi Memleket basshysynyń keńesshisi, Qusbegilik federasııasynyń prezıdenti Berik Ýálı.
Sóıtip, ultty uıystyratyn rýhanı shara sońynda júldegerler marapattalyp, uıymdastyrýshylar alǵys arqalady. Oblys ákimi Ermek Kósherbaev alys-jaqynnan kelgen qonaqtarǵa jyly lebizin bildirip, is-sharanyń uıymdastyrylýyna úlken úlesin qosqan kásipker Muhtar Toıbazarovqa alǵyshat tabystady. Al Berik Ýálı shyǵys jurtshylyǵy atynan búrkitshi qyz Aısholpan Nurǵaıypqyzyna eki bólmeli páterdiń kiltin tabystap qýantty. Mundaı syılyqty kútpegen qusbegi qyzdyń kózinen qýanyshtyń jasy yrshyǵany da ras edi.
«Men úshin úlken tosynsyı boldy. Halyqqa alǵysymdy bildiremin. Elimizdiń abyroıyn bıikke kóterý jolynda talmaı eńbektenýge ázirmin», dedi Aısholpan Nurǵaıypqyzy.
Qýanyshty sátten soń júrgizýshi sahna tórine kezek-kezegimen júldegerlerdi shaqyrdy. Sonymen, «Shyǵys salbýryny – 2024» halyqaralyq týrnıriniń Búrkit qusy boıynsha júldeli úshinshi oryn Aqmola oblysynan kelgen Erlan Kenjetaev pen Almaty oblysynan kelgen Oljas Berdimuratqa berildi. Ekinshi oryndy Astanadan at arytyp kelgen Serikbek Kúntýǵannyń búrkitine buıyrdy. Al birinshi oryndy jetisýlyq Sálimhan Erǵazyuly qanjyǵaǵa basty.
Qarshyǵa qusy boıynsha birinshi oryn Erasyl Serikbekuly (Astana qalasy), ekinshi oryn Ermuhan Báıetbaı (Almaty oblysy), úshinshi oryn Babajan Berikbolsyn (Jambyl oblysy), Jańbyrbek Berdııarǵa (Jambyl oblysy) berildi.
Itelgi qusy boıynsha birinshi, ekinshi oryndardy Tańat Ospanqulov (Qaraǵandy oblysy) alsa, úshinshi oryn qaraǵandylyq Temirli Tólegenuly men Pavlodar oblysynyń qusbegisi Ermek Imanzaıyptyń búrkiti aldy.
Saıys sońynda arqa-jarqa jurt bir-birine qutty bolsyn aıtysyp, estelik sýretterge tústi. Kóshpeliler oıyndarynyń jalǵasyna ulasqan týrnır keler jyly da jalǵasyn tappaq.
Shyǵys Qazaqstan oblysy,
Ulan aýdany,
Bozanbaı aýyly
