Taraz qalasynyń ákimi Baqytjan Orynbekovtiń aıtýynsha, oblys ortalyǵynda jańa jumys oryndaryn qurý baǵytynda aýyz toltyryp aıtarlyqtaı jumys atqarylyp jatyr. Qala bıligi turǵyndardy jumyspen qamtý maqsatynda jańa óndiris oryndaryn ashýdyń mańyzy zor ekenin alǵa tartady.
Jergilikti atqarýshy bılik qala ekonomıkasynyń turaqty ósimin qamtamasyz etý maqsatynda ınvestısııa tartýǵa basymdyq berip otyrǵanyn aıta ketken jón. B.Orynbekovtiń aıtýynsha, aldaǵy ýaqytta jalpy quny 34,7 mlrd teńgeni quraıtyn 5 ınvestısııalyq jobany iske asyrý josparlanǵan. Qolǵa alynǵan jobalardy júzege asyrý arqyly 944 jańa jumys ornyn ashý kózdelgen.
Birer kún buryn Taraz qalasynda «Alel Agro» aksıonerlik qoǵamyna qarasty óndiristik ınkýbator iske qosyldy. Derekke júginsek, óndiristik ınkýbator jylyna 38 mıllıon balapan basyp shyǵarýǵa qaýqarly eken. О́ndiris oshaǵy 50 azamatty jumyspen qamtıdy.
«Kez kelgen memlekettiń áleýmettik áleýeti artýyn birinshi kezekte óndiristi órkendetýdiń mańyzy zor. Bir sózben aıtqanda, ekonomıkalyq ósimdi turaqty qamtamasyz etý de jańa óndiris oryndaryn ashyp, ekonomıkanyń naqty sektoryna ınvestısııa tartýymyz kerek. Bul – memlekettik saıasattyń basty basymdyqtarynyń biri. Qazir osy baǵyttaǵy iri jobalardy júzege asyrýda naqty jumys atqaryp jatyrmyz.
El bıliginiń jan-jaqty qoldaýynyń nátıjesinde oblys ortalyǵy Taraz qalasy da ınvestısııa ıgiligin sezinip otyrǵanyn atap ótken jón. Oblys ortalyǵynda jalpy quny 35 mıllıardqa jýyq qarjyny quraıtyn birneshe ınvestısııalyq joba bar. Bul jobalar júzege asyrylǵan kezde 944 jańa jumys orny ashylady dep boljap otyrmyz.
Budan bólek, jalpy quny 48 mıllıard teńgeni quraıtyn 3 ınvestısııalyq jobany iske asyrýǵa qatysty arnaıy kelissózder júrgizilýde. Búgin óz jumysyn bastaǵan «Alel Agro» aksıonerlik qoǵamynyń oblystyq fılıaly qalamyzdaǵy kásipkerliktiń kókjıegin keńeıtip, damýdyń jańa belesine bastaıdy degen senim zor», deıdi Taraz qalasynyń ákimi B. Orynbekov.
Joǵaryda aıtqanymyzdaı, jylyna 38 mıllıon balapan basyp shyǵarýǵa qaýqarly óndiris oshaǵynda qyzmetkerlerdiń alańsyz jumys isteýine barlyq jaǵdaı qarastyrylǵan. Qalalyq kásipkerlik bólimi keltirgen derekke júginsek, jalpy quny 2 mıllıard 689 mıllıon teńgeni quraıtyn óndiris orny zamanaýı qural-jabdyqtarmen qamtamasyz etilgen. Inkýbatorǵa qajetti shıkizat kompanııanyń ishki óndirisi arqyly júzege asyrylady.
Jalpy alǵanda, jergilikti atqarýshy bılik qalada jumyssyzdyq deńgeıin tómendetý maqsatynda aýqymdy jumys atqaryp keledi. Máselen, osy jyldyń alǵashqy 8 aıyndaǵy qorytyndy derekke sensek, jumyssyzdyq deńgeıi ótken jylmen salystyrǵanda 0,8 paıyzǵa tómendepti. Statıstıkalyq kórsetkish qolǵa alynǵan ózge sharalardan bólek, qalaǵa tartylǵan ınvestısııa esebinen de joǵarylaǵanyn aıta ketken lázim.
TARAZ
