«Abylaı han rezıdensııasy» murajaı kesheniniń aýmaǵynda «Taza Qazaqstanmen birgemiz» jastar ekologııalyq aksııasy ótkizildi. Is-sharany oblystyq jastar resýrstyq ortalyǵynyń ókilderi uıymdastyrdy. Aksııaǵa kolledj stýdentteri, eriktiler, jumysshy jastar qatysty.
«Tabıǵatty qorǵaý óte mańyzdy, óıtkeni ol – ortaq baılyǵymyz. Árqaısymyz qorshaǵan ortany qorǵaýǵa úlesimizdi qosýymyz kerek. О́z basym qalamyzda ótip jatqan barlyq ekologııalyq aksııaǵa úzbeı qatysýǵa tyrysamyn. Elimizdegi ekologııalyq qozǵalys damyp, ári qaraı nyǵaıa túsetinine kámil senemin. Tabıǵatty qorǵaýdyń mańyzdylyǵyn kóp jastar jaqsy túsinip keledi. Osyndaı aksııalardy birge uıymdastyryp, ekologııalyq máselelerdi jıi kóterip otyrsaq, elimizdi taza ári jasyl el ete alamyz», deıdi «Jastar Assambleıasy» birlestiniń SQOF basshysy Darıǵa Smaıylova.
Jastardyń «Birgemiz» volonterlik front-keńsesi tabıǵı resýrstar jáne tabıǵatty paıdalanýdy retteý basqarmasymen birlesip, Meshan ormanynyń aýmaǵynda sporttyq-ekologııalyq marafon ótkizdi. Bul ormanǵa erterekte qalalyqtar demalys alyp, taza aýamen tynystaý maqsatynda kelip turady eken. Ol kezde orman qalanyń ortalyǵynan 10 shaqyrymdaı jerde. Oǵan ult aqyny Maǵjan Jumabaev ta jarymen kelip, dostarymen dıdarlasatyny jóninde onyń nemere inisi Ǵadilsha Qaharmanov óziniń «Jájeke» degen kitabynda jazǵan. Qazir orman qalanyń aýmaǵyna kirgen. Biraz jeri otalyp qalǵanymen, negizgi sulbasy saqtalǵan. Osy ormandaǵy «Taza orman» atty ekologııalyq aksııasy aıasynda qoqys jınaý jarysyna jumysshylar, stýdentter, sondaı-aq eriktiler bar, barlyǵy 80-deı adam qatysty. Marafon tazalyq mádenıetin qalyptastyrý, qorshaǵan ortaǵa uqypty qaraý deńgeıin arttyrý maqsatynda uıymdastyryldy. Aksııa 40 mınýttyq qoqys jınaý marafony túrinde ótti. Jeńimpazdar dıplomdar men syılyqtarǵa ıe boldy.
Aksııa bastalǵannan beri aýmaqtardy tazartýǵa 152,2 myńǵa jýyq jastar jumyldyrylǵan. Esil ózeni jaǵalaýy kúl-qoqystan tazartyldy. Barlyǵy 211 skver men saıabaq abattandyrylyp, 150,6 myń tonna qoqys shyǵaryldy, 32,5 myńnan astam aǵash, 3,2 myńnan astam kóshet otyrǵyzyldy.
Soltústik Qazaqstan oblysy
