Endoskopııa – skalpeldiń kómeginsiz qýys múshelerdi qaraýǵa múmkindik beretin aspaptyq dıagnostıka. Jańa ortalyq pasıentterge dıagnostıka men emdeýdiń eń ozyq ádisterin qoldanýǵa múmkindik beretin zamanaýı qondyrǵylarmen jabdyqtalǵan. Ortalyqtaǵy aspaptar arqyly endoskopııalyq, rentgenologııalyq zertteýdi biriktirip, asqazan-ishek joldarynyń joǵarǵy bóligine, ót joldaryna, uıqy bezi men as qorytý joldarynyń aýrýlaryna sapaly dıagnostıka jasaýǵa, tıimdi emdeýdi qamtamasyz etýge bolady deıdi mamandar.
Oraldaǵy ortalyqtyń ashylýyna A.N.Syzǵanov atyndaǵy Ulttyq hırýrgııa ǵylymı ortalyǵynan Strategııalyq damý bóliminiń basshysy, medısına ǵylymdarynyń kandıdaty, joǵary sanatty hırýrg dáriger Ońlasyn Ibekenov pen klınıkalyq fızıologııa jáne endoskopııa bóliminiń meńgerýshisi Aban Ábdirashev arnaıy shaqyrylǵan eken.
– Búginde kóptegen operasııa endoskopııalyq aralasýlardyń kómegimen jasalady. Ásirese asqazan-ishek joldarynan qan ketý kezinde endoskopııalyq gemostaz jasaý arqyly qan ketýdi 90 paıyzǵa deıin toqtatýǵa bolady. Buryn ashyq operasııalar jasalatyn, ólim-jitim de óte joǵary bolatyn. Qazir tek endoskopııalyq gemostaz arqyly qandy toqtatyp, syrqattyń asqazan-ishek joldarynan qan ketý kezinde bolatyn shetin oqıǵalar sanyn azaıttyq, – deıdi Ońlasyn Tólegenuly.
Jańa ortalyqta asqazan-ishek joldarynyń patologııalaryna, ókpe-qolqa aýrýlaryna dıagnostıkalyq zertteý jasalady. Endoskopııalyq ádispen emdeý júrgiziledi. Al ınvazıvti operasııalar aýrýhanada jatý ýaqytyn qysqartyp, ońaltý kezeńin azaıtýǵa múmkindik beredi. Oblys turǵyndary munda dıagnostıkalyq tekserýden (FGDS, kolonoskopııa) ótý nemese em qabyldaýǵa (polıpektomııa) óz mekenjaıynda tirkelgen emhananyń joldamasy arqyly kele alady. Ortalyqtyń ashylýyna oraı ótken saltanatty is-sharadan soń Ulttyq ǵylymı hırýrgııa ortalyǵy mamandary «Endoskopııalyq papıllosfınkterotomııa» (EPST), «О́ńeshtiń varıkozdy tamyrlaryn endoskopııalyq baılaý» (VRVP) jóninde sheberlik saǵatyn ótkizdi.
Batys Qazaqstan oblysy
