Keıingi jyldary mal sharýashylyǵyna den qoıyp, oblys ortalyǵyn etpen qamtamasyz ete bastaǵan Besaryq aýylynda qyrkúıektiń sońǵy kúninde bes birdeı óndiris orny ashyldy. Kásipkerlerdiń keıbiri isin jańa bastasa, birazy buryn bıznesin úı jaǵdaıynda júrgizip kelgen. Solardyń biri – nan óndirisin jolǵa qoıǵan Gúlmıra Smaǵulova.
«Aýyl amanaty» jobasy arqyly 7 mln teńge jeńildetilgen nesıe aldym. О́nimniń sapasy men salmaǵyna qatty mán beremiz. Osyndaı ortalyq salyp, bizge jaǵdaı jasaǵan el azamattaryna aıtar alǵysymyz sheksiz», deıdi kásip ıesi.
Aýyldan shyǵatyn sabyn, qolǵap, plastıkalyq ydystar men shulyqtarǵa ózge óńirlerden de tapsyrystar túsip jatyr eken. Aýyl turǵyny Jarqyn Saparǵalıuly – óńirlik ınvestısııalyq ortalyq kómegimen tyń kásip bastaǵan jannyń biri. Osydan eki jyl buryn kelinshegi ekeýi oıý-órnek basyp shyǵarý týraly oılasyp, biraz izdenipti.
«Bastapqyda shaǵyn qurylǵymen amaldadyq. Onlaın tapsyrys arqyly jumys istedik. Bıyl qoldaýdyń arqasynda sapasy joǵary qurylǵylardy satyp aldyq. Sırek kásip bolǵandyqtan, elimizdiń barlyq óńirinen suranys bar», deıdi.
Besaryq aýyldyq okrýgi ákimdiginiń ádiskeri Bıbizada Bekenova aýyl kásipkerlerine óńirlik ınvestısııalyq ortalyqtan 3, «Aýyl amanaty» arqyly 4 jobaǵa qoldaý jasalǵanyn aıtady. Osyndaı demeýdiń arqasynda eldegi iskerlerdiń jańa kásip ashýǵa qyzyǵýshylyǵy oıana túsken.
О́ndiristik ortalyqta shyǵyp jatqan plastıkalyq qutylar da – asa qajet ónim. Jan-jaqtan túsip jatqan suranysqa saı aldaǵy ýaqytta qutylardyń 5 lıtrligin de shyǵarý oılastyrylyp otyr.
Osy aýyldaǵy mektep muǵalimderi Samat Aqpanbetov pen jary Gúlzıra qolǵap óndirisin biraz zerttep, oblysta sharýashylyqqa qoldanatyn jumys qolǵaptary shyqpaıtynyna kóz jetkizipti. Bizge bul taýar Shymkent pen Qytaıdan keledi eken. Osydan keıin beldi býyp, Tarazda osy salaǵa mashyqtanǵan kásipkerlerge seriktes bolyp, Qytaıdan qolǵap shyǵarýǵa qajet jip pen shaǵyn qondyrǵy aldyrady.
«Kásipke qajet qarjyny «Qyzylorda» óńirlik ınvestısııalyq ortalyǵynan aldyq. Qazir naryqta jumys qolǵaptary 120–150 teńgeden satylyp jatsa, biz 80–85 teńgeden saýdalap jatyrmyz», deıdi Samat Aqpanbetov.
Qazir kúnine 200–250, aptasyna 1 200–1 500 qolǵap shyǵaryp jatyr. Aýyldaǵy óndiris ortalyǵy memlekettiń qoldaýy arqasynda elde de kásip bastaǵandar qatary kóbeıe túskenin kórsetip otyr.
Qyzylorda
