Foto: syrboyi.kz
Zań jobasy Memleket basshysynyń bank sektoryndaǵy ruqsat berý talaptaryn ońtaılandyrý jónindegi tapsyrmasyn iske asyrý maqsatynda ázirlengen. Sondaı-aq qarjy naryǵyn odan ári damytý men básekelestikti arttyrýǵa, tutynýshylardyń quqyqtaryn qorǵaýdy kúsheıtý úshin sheteldik bankterdiń fılıaldaryn tartýǵa baǵyttalǵan.
Qarjy naryǵyn damytý týraly bul zań jobasy bank sektoryna ınvestısııa tartýdaǵy ákimshilik kedergilerdi azaıtýǵa baǵyttalǵan. Osyǵan baılanysty enshiles sheteldik bankter men olardyń fılıaldaryn ashý talaptary jeńildeıdi. Beırezıdent banktiń ýákiletti organǵa usynatyn qujattar tizimi qysqartylady.
«Sheteldik banktiń jıyntyq aktıvteriniń eń tómengi kólemin 20-dan 10 mıllıard AQSh dollaryna deıin qysqartý josparlanǵan. Sonymen qatar sheteldik bankterdiń fılıaldaryna jeke tulǵalardyń depozıtterin tartý, tólem kartochkalaryn shyǵarý, shetel valıýtasymen aıyrbastaý operasııalary, sındıkattalǵan qarjylandyrý jáne basqa da qyzmetterdi kórsetýge ruqsat etiledi», delingen Májilis habarlamasynda.
