Kenttegi sońǵy jańalyqtyń biri – «Jastar» alleıasy. Aýdan ortalyǵyna kireberiste oryn tepken alleıa quny 83,2 mln teńge. Jastar bıyl aýdandyq bıýdjetten qarjysy bólinip, jumys bastalǵan aýmaqta aryqtardy tazalady.
«Bul alleıa jastardyń serýendep, bos ýaqytyn tıimdi paıdalanýy úshin jasalyp jatyr. Erikti jastar men «Jasyl eńbek jasaǵy» sarbazdary aksııaǵa aýqymdy úles qosyp keledi. Aýdanda «Taza Qazaqstan» bastamasy aıasynda uıymdastyrylǵan is-sharalarǵa 3 myńǵa jýyq jas qatysty. Kent pen 13 aýyldyq okrýgte eriktiler shtaby qurylyp, turaqty jumys istep keledi. Odan bólek, kenttegi «Jasyl eńbek jasaǵy» eki jyl qatarynan oblystaǵy úzdik uıym bolyp tanylyp otyr. Byltyr 220, bıyl 110 jasty turaqty jumyspen qamtydyq», deıdi aýdandaǵy jastar qozǵalysynyń jetekshisi Nurjan Seıitjanov.
Tereńózektiń qaı kóshesinen de tynymsyz jumys baıqalady. Ortalyq alańǵa kishi arhıtektýralyq formalar qoıylyp, jalpy quny 106 mln teńge bolatyn jobaǵa sáıkes «Taǵzym» alańy da jańǵyrtylyp jatyr. Uzaq jyldar boıy kenttegi kópqabatty úılerdi jańǵyrtyp, aýlalaryn abattandyrýǵa múmkindik bolmaı kelgen edi. Bıyl osy jumysqa respýblıka bıýdjetinen 167,2 mln teńge qaralyp, onyń 60 mln teńgesi bólinipti. Qazir merdiger mekeme «SP Birlik Injınırıng» JShS kópqabatty turǵyn úıler aýlasyndaǵy jol jıekterine bordıýr qoıyp, balalar oıyn alańdarynyń qorshaýlaryn qalypqa keltirip, turǵyndardyń aýlada tynyǵýyna jaǵdaı jasady.
«Shıeli Jolshy» JShS kenttegi ortalyq kóshelerge jaıaý júrginshiler jolyn salyp jatyr. Bes kóshe boıyna trotýar salý jobasynyń quny – 366 mln teńge. Kent ákimi Erjan Baqtııarov jalpy Tereńózektegi jol, qurylys salasyndaǵy jobalarǵa sholý jasaı kelip, aýdan ortalyǵyna kireberis aýmaqty kórkeıtý-kógaldandyrý kóptiń kómegimen bolyp jatqanyn aıtty.
«Taza Qazaqstan» aksııasynyń aıasynda turǵyndardyń kómegimen 11 park, skver abattandyryldy. Aldaǵy ýaqytta kúre joldan kentke jetkizetin jol boıyna «jasyl beldeý» qalyptastyrý josparda bar», deıdi kent ákimi.
Aýdan ortalyǵynyń irgesindegi Asqar Toqmaǵambetov aýylyna osydan 20 jyldaı buryn ǵana taza aýyzsý qubyry tartylǵan edi. Munda da qarbalas tirlik. On alty kóshesiniń on úshine asfalt túsken. Endi kóshedegi elektr jelilerin jańǵyrtýǵa bıýdjetke usynys berilipti. Aýyl turǵyndary búgin-erteń tabıǵı gazǵa qol jetkizgeli tur. Merdiger mekeme «AES and Limited» JShS ókili Rýslan Maqsymov 20 shaqyrymnan asatyn gaz qubyryn tartý aıaqtalyp, aýyldaǵy 356 úıdiń 104-i montajyn júrgizip, «kógildir otyn» ıgiligin kórýge daıyn otyrǵanyn aıtady.
Qyzylorda oblysy,
Syrdarııa aýdany
