Myrzabosynov Stanıslav Cherchesovtiń «fransýz tiline» qatysty qaljyńy orynsyz bolǵanyn aıtty. Jáne muny Qazaqstan fýtbol federasııasy da, bapkerdiń ózi de túsingenin jazdy.
- Cherchesovtiń basty mindeti – ulttyq quramany jańa deńgeıge shyǵarý. Endeshe, oǵan eń aldymen kásibı qyzmetine qarap baǵa berýge shaqyramyn. Biz qashannan qonaqjaı, darhan minezdi, keshirimdi elmiz. Bizdi myqty el etetin de osy qasıetter. Sondyqtan máseleni odan ári órshite bermeı, halqymyzǵa tán keńpeıildik tanytqanymyz abzal.Kez kelgen daýly máseleni aqyl-parasatpen sheshetin tolerantty, órkenıetti, ıaǵnı dana qoǵam ekenimizdi kórsete bileıik,- dedi mınıstr Myrzabosynov.
Ári qaraı sport mınıstri Stanıslav Cherchesovtiń halyqaralyq deńgeıdegi tanymal fýtbolshy ekenin ári 20 jyldyq tájirıbesi bar kásibı jattyqtyrýshy ekenin aıtyp, jankúıerler úmitin aqtaıdy dep senim bildirdi.
Buǵan deıin Qazaqstan fýtbol komandasynyń bas bapkeri Stanıslav Cherchesov qazaq tilinde suraq qoıǵan jýrnalıske “sen fransýz tilinde sóılep otyrsyń ba?” degen. Osy sózi qoǵamda qyzý talqyǵa túsip, ony synaǵandar kóbeıdi.
Federasııa basshysy Ádilet Bármenqulov shekten shyqqan Cherchesovke aıyppul salynǵanyn aıtty.
