Búginde kishi serjant R.Batyrqanovtyń esimin enshilegen shekara bólimshesi jas shekarashy sarbazdardy batyrlyq pen patrıottyqqa úndeıtin tárbıe ortalyǵyna aınalǵan. О́zi týǵan Katonqaraǵaıda kóshe men mekteptegi múıis batyrdyń esimimen atalady.
Al osynaý erlik qalaı jasalyp edi? 1994 jylǵy 28 qyrkúıekte Hakım bandasynyń 200-den astam qarýly sodyry 9 avtokólikpen Tájikstannyń Horog qalasy mańyndaǵy memlekettik shekarasyn kesip ótip, Aýǵanstanǵa ótýge bet alady. Olardyń jolyna 38 qazaqstandyq jáne reseılik shekarashy tosqaýyl bolyp turady.
Soǵysqa birinshi bolyp kirgen reseılik ofıser Konstantın Selıýk pen Radjan Batyrqanov qarýlastaryna modjahedterge tyldan shabýyldaýǵa múmkindik beredi. Alaıda urysta aýyr jaraqattanǵan Radjan kóp qan joǵaltyp, esin jımastan qaza tabady. Urystyń nátıjesinde modjahedter joıylyp, sodyrlardyń kepilindegi adamdar qutqarylady.
Kórsetken erligi men batyldyǵy úshin kishi serjant R.Batyrqanov qaza tapqannan keıin Qazaqstan Prezıdentiniń Jarlyǵymen II dárejeli «Aıbyn» ordenimen marapattaldy. Al Táýelsizdigimizdiń 30 jyldyǵyna oraı, batyr shekarashy Tájikstan Respýblıkasynyń joǵary nagradasy – I dárejeli «Spıtamen» ordeniniń ıegeri atandy.
Bıyl 28 qyrkúıekte elimizdiń túkpir-túkpirinde shekarashy R.Batyrqanovtyń esimin ulyqtap, erligine taǵzym etýge arnalǵan is-sharalar ótti. Solardyń bir parasyn Ulttyq qaýipsizdik komıteti Shekara qyzmetiniń Almaty oblysy boıynsha departamenti uıymdastyrdy. Shekarashy ardagerler men jeke quram «Máńgilik alaýǵa» gúl shoqtaryn qoıyp, batyrlar, Táýelsizdik jyldary erlikpen qaza tapqan shekarashylardyń rýhyna taǵzym etken soń, №102 orta mektebiniń oqýshylary «Jas shekarashy» áskerı-patrıottyq klýbynyń qataryna kirý úshin ant qabyldady.
Aıta keterligi, atalǵan mekteptiń 7 «Á» synyby R.Batyrqanovtyń esimimen atalǵany týraly aqjarma habardy departament bastyǵynyń orynbasary polkovnık A.Munalbaev «Máńgilik alaý» basyna jınalǵan kópshilikke tolqı turyp jetkizdi. Budan ári jas patrıottar Armııa úıine baryp, Ekinshi dúnıejúzilik soǵys qaharmany general I.Panfılov murajaıyn aralap kórdi.
Tamara DÁÝLETBAEVA,
UQK Shekara qyzmetiniń zapastaǵy podpolkovnıgi
ALMATY
Ustazǵa qurmet – kóregendikten
Ile aýdanynyń Baıkent aýylyndaǵy №10 orta mektebiniń irgesi qalanǵanyna 50 jyl toldy. Keńes dáýirinde mektep tolyǵymen orys tilinde bilim bergen bolatyn. Tek Elimizdiń egemendigi týraly deklarasııa qabyldanǵan 1990 jyly qazaq synyptary ashyla bastasa, alǵashqy qazaq synybyna 9 bala qabyldanǵany kúni keshegideı esimizde. Bul, árıne, sol kezde úlken tabandylyq pen erik-jigerdi qajet etti.
1986 jyly mektep basshylyǵyna Jumahan Tasybekov keldi. Ol dırektorlyq qyzmetti 2003 jylǵa deıin 13 jyl boıy tabysty atqardy. Ujymnyń aqylshysy, týyndaǵan qıyndyqty der kezinde sheshe bilgen uıymdastyrýshy boldy. Bilim ordasyna odan keıin basshylyq jasaǵan pedagogter de esh aıanyp qalǵan joq. Máselen, Álipbek Baıdáýletov mektepti kúrdeli jóndeýden ótkizip, barshanyń rızashylyǵyna bólendi. Búginde oqý ordasyna Jadyra Oqasova basshylyq jasaıdy. Al sol kezden bertinge deıin qazaq synyptaryna óz mamandyqtaryna saı adaldyq tanyta otyryp dáris bergen Ásııa Qurmanbaeva, Ábdibaı Qorǵanbaev, Qalı Isabekov, Temirhan Qarsybaev, Ermek Bılibaev, Toıdyq Sarmanova, t.b. bir top pedagog bolǵanyn da atap kórsetken oryndy.
Dana halqymyzdyń «Ustazǵa qurmet – kóregendikten» degen tamasha sózi bar. Alashtyń ardaqtysy Maǵjan Jumabaev «Alty alashtyń basy qosylsa, tór – ustazdyki» deıdi. Osy ustanymdarǵa laıyqty ustazdar oqýshylardy bilim nárimen sýsyndatyp qana qoımaı, mekteptegi is-sharalarǵa da bilek sybana qatysyp keledi. Ata-analarmen birge balalardyń tárbıe jumysyna da bar bilimi men biligin jumsap, úlken úles qosyp júr. Olardyń qatarynda oqý isiniń meńgerýshileri Altyn Tortaıqyzy, Jámıla Abylaıqyzy, Názıgúl Qojasqyzy, Móldir Turymbetova, tárbıe isiniń meńgerýshileri Áıgerim Qoıgeldıeva, Larısa Aımahanova sııaqty pedagogter bar. «Alǵashynda bul mektep 640 balaǵa arnap ashylsa, 45 muǵalim men 700-deı oqýshy qabyldanypty. 50 jylda 3000-ǵa jýyq túlek túlep ushqan. Búginde oqý ordasynda 1503 oqýshy bilim alyp júrse, olarǵa 125 muǵalim sabaq beredi», deıdi Jadyra Qasymhanqyzy.
Gúlzıra NÚKIShEVA,
ardager ustaz
Almaty oblysy
Aqyn álemimen tanystyrdy
«El Arna» telearnasy – ózindik kórermender aýdıtorııasy qalyptasqan, irgeli shyǵarmashylyq ujym. Osynda kúndelikti tanym kókjıegin keńeıtetin qyzyqty da áserli habarlar kógildir ekrannan jıi berilip turady. Sondaı dúnıelerdi tamashalaıtyndardyń qatarynda barmyz. Kezekti kórsetilimderdiń biri taıaýda qazaqtyń ónerli uldarynyń biri, Májilis depýtaty, aqyn Rınat Zaıytovqa arnalǵan eken.
Qazaqta «О́tkir pyshaq qyn túbinde jatpaıdy» degen támsil bar. Ol Rınat sekildi azamattarǵa qaratyp aıtylsa kerek. Bul jigitti qalyń kópshilik negizinen aıtys aqyny retinde jaqsy biledi. Endigi jerde saılaýshylar senimine ıe bolyp, Parlament minberinen eldik máselelerdi de jıi kóterip júrgenine kýámiz.
О́ner álemine jastaı qanat qaqqan talapty jas 15 jasynda-aq terme jazǵan eken. Poezııalyq án keshinde avtor balasyna arnap jazǵan termesin oryndap, jurtshylyqty oıǵa batyrdy. Osy is-sharaǵa qatysyp otyrǵan ákesin ulyqtaýmen birge, anasyna degen saǵynyshyn «Mama» atty ánimen jetkizdi. Ara-arasynda sońǵy ýaqytta qalamynan týǵan jyr joldarymen tanystyrdy. Parlament Májilisiniń depýtaty, belgili telejúrgizýshi Maqsat Tolyqbaı áriptesiniń keshinde qýanyshymen bólisip, án shyrqady. Qazaqtyń osyndaı besaspap, talantty jigitterin kórgende rıza bolatynymyz bar endi.
Osylaısha, bul kúni kórermender Rınattyń ádemi álemine boılap, bir serpildi.
Káribaı ÁMZEULY,
zeınetker
Túrkistan oblysy
