Ádil Qundaqbaev
Polisia.kz jazǵandaı, jedel-izdestirý is-sharalaryn júrgizý kezinde kóshi-qon qyzmeti basqarmasynyń qyzmetkerleri 8 jyl boıy halyqaralyq izdeýde júrgen О́zbekstan azamatyn anyqtady. 41 jastaǵy izdeýde júrgen qylmyskerdi polısııa qyzmetkerleri Turan aýdanyndaǵy jaldamaly páterlerdiń birinde ustady.
Qazirgi ýaqytta er adam sottyń sheshimimen respýblıka aýmaǵynan alastatylyp, bes jylǵa deıin Qazaqstanǵa kirmeýge sheshim shyǵaryldy.
Atap óteıik, 2024 jyldyń 14-18 qazan aralyǵynda «Zańsyz kelýshi – 2024» jedel profılaktıkalyq is sharasy barysynda kóshi-qon zańnamasyn buzǵan 556 sheteldik pen Qazaqstan Respýblıkasynyń azamattary anyqtalyp, ákimshilik jaýapkershilikke tartyldy.
Sonymen qatar Shymkent qalasy PD-nyń qabyldap-taratý ornyna jeke bastaryn anyqtaıtyn qujattary joq 135 adam ornalastyryldy. QR-da bolý erejelerin buzǵan 408 sheteldik azamat anyqtalyp, QR ÁQBtK-niń 517-babymen ákimshilik jaýapkershilikteri qaraldy.
Shetel azamatyn zańsyz turǵyn úımen qamtamasyz etken jáne sheteldik jumys kúshin zańsyz paıdalanǵan 114 azamat QR ÁQBtK-niń 518-babymen jáne taǵy 34 Qazaqstan azamaty QR ÁQBtK-niń 519-babynyń talaptaryn buzǵan. Kóshi-qon zańdylyǵyn óreskel buzǵan 61 sheteldik Qazaqstan Respýblıkasy aýmaǵynan alastatyldy. 44 sheteldiktiń Qazaqstan Respýblıkasynda bolý merzimderi qysqartyldy.
