Foto: Ashyq derekkóz
Eske sala keteıik, halyqqa tazartylǵan altyn quımalardy satý jáne satyp alý baǵdarlamasyn Ulttyq bank 2017 jyly iske qosqan edi. Baǵdarlama qolǵa alynǵaly jalpy salmaǵy 7,4 tonna 199 235 altyn quıma satylǵan.
«Altyn quımalar bes túrli salmaqta usynylady: 5, 10, 20, 50 jáne 100 g. Satyp alýshylar arasynda óte joǵary suranysqa ıe túri – 10 gramdyq altyn quıma. Jalpy satylǵan quımalar arasynda onyń úlesi 24% – 48 629 dana. Odan keıin 100 gramdyq altyn quıma – 47 227 dana (24%), 5 gramdyq quıma – 44 127 dana (22%), 20 gramdyq quıma – 31 612 dana (16%), jáne 50 grammdyq quıma – 27 640 dana (14%)», dep habarlady Ulttyq banktiń baspasóz qyzmeti.
2024 jylǵy III toqsanda altyn quımalardyń eń kóp bóligi Almatyda (8 101 dana, 58%), Shymkentte (1 279 dana, 9%) jáne Astanada (1 243 dana, 9%) satylǵan.
Ulttyq bank altyn quımalardyń senimdi ınvestısııa quraly bola alatynyn eske saldyn. Altyn quımalar naryǵyndaǵy ótimdiliktiń basty kepili – bank pen banktik emes aıyrbastaý pýnkteri klıentke aqshany sol kúni tóleı otyryp, altyn quımalardy keri satyp ala alady.Baǵdarlama júzege asqaly ekinshi deńgeıli bankter men banktik emes jekelegen pýnkter jalpy salmaǵy 1,1 tonna 41 058 altyn quımany keri satyp alǵan. Bul – jalpy satylǵan altyn quımalardyń 21%-y.
«Árbir quıma qorǵaý elementterimen qaptalǵan (quımanyń aına beti, mıkrotekst jáne bederli jıegi bar) jáne mehanıkalyq zaqymdanýdan qorǵaıtyn arnaıy qorapqa salynyp shyǵady. Sol arqyly quımanyń ashylǵan-ashylmaǵanyn ońaı tekserýge bolady. Qorǵap turatyn qorap sondaı-aq sapa sertıfıkaty bolyp sanalady. Sondyqtan, altyn quımany uqypty saqtap, qorabyn búldirmeýge keńes beremiz», delingen habarlamada.
