Foto: baq.kz
Mınıstrliktiń habarlaýynsha, búgingi tańda elimizde bala quqyǵy buzylýynyń aldyn alý jáne olarǵa kómek kórsetý boıynsha memlekettik organdar men uıymdardy úılestirýde negizgi ról atqaratyn 235 komıssııa qyzmet etedi. Al olardyń jumys tıimdiligin arttyrý úshin 2024 jyly normatıvtik-quqyqtyq bazaǵa eleýli ózgerister engizý josparlanǵan. Onyń ishinde jaǵdaıdy basqarý (keıs-menedjment) jáne medısınalyq-áleýmettik esepke alý modelin engizý bar.
«Otbasyn qoldaý ortalyqtarymen ózara is-qımylǵa erekshe nazar aýdarylatyn bolady. Bul qıyn ómirlik jaǵdaılardaǵy balalardy jáne olardyń otbasylaryn keshendi súıemeldeýdi qamtamasyz etýge múmkindik beredi. Sondaı-aq, oblystyq, qalalyq jáne aýdandyq komıssııalar arasyndaǵy ózara árekettesýi naqty ajyratylatyn bolady. Bul balalardyń quqyqtaryn qorǵaý júıesiniń jalpy tıimdiligin arttyrady jáne memlekettik basqarý deńgeıleri arasyndaǵy is-qımyldardy úılestirýdi jaqsartyp, muqtaj balalarǵa kómek kórsetýdi aıtarlyqtaı jyldamdatady», dep atap ótti QR Oqý-aǵartý mınıstrligi Balalardyń quqyqtaryn qorǵaý komıtetiniń tóraıymy Nasymjan Ospanova.
Vedomstvo atalǵan sharalar balalardyń quqyqtaryn qorǵaý júıesin nyǵaıtýǵa jáne ómirlik qıyn jaǵdaıǵa tap bolǵan árbir balaǵa ýaqtyly, sapaly kómekti qamtamasyz etýge baǵyttalǵanyn atap ótti.
