Jergilikti atqarýshy bılik keıin-gi kezderi qaladaǵy qoǵamdyq kólikterdi jańartýǵa aıryqsha nazar aýdaryp otyr. Uzaq jyldar boıy paıdalanylǵan, tozyǵy jetken avtobýstardyń ornyn qazir jańa qoǵamdyq kólikter almastyryp jatyr. Jalpy, Taraz qalasyndaǵy avtobýstardy jańartý máselesin óńir basshysy Erbol Qarashókeev jeke baqylaýyna alǵan.
Birshama ýaqyt buryn Taraz qalasynyń ákimi Baqytjan Orynbekov qoǵamdyq kólikterdi jańartý jumysy úzdiksiz jalǵasa beretinin aıtqan edi. Sondaı-aq Tarazda aıaldamalardy jańalaý jumysy da qarqyndy túrde júrgizilip jatyr.
Oblys ortalyǵynda qoǵamdyq kólikterdi jańartý, jańa baǵyttardy iske qosý máselesi qalany damytýdyń úsh jyldyq josparyna engizilgen. Qala bıliginiń yqpalymen birer kún buryn Tarazǵa taǵy 16 avtobýs jetkizildi.
«Bıyl áleýmettik mańyzy bar qalalyq, qala mańyndaǵy jolaýshylar qatynastary tizbesine engizilgen avtobýs baǵyttarynyń shyǵynyn óteý maqsatynda 4,8 mlrd teńge sýbsıdııa qarastyrylǵan bolatyn. Budan bólek, oblys ortalyǵynda 75 aıaldama ornatylady. Álbette, bul az jumys emes. Jalpy, qaladaǵy qoǵamdyq kólikterdi jańartý jumysyn ilki sátke de toqtatpaımyz. Bir sózben aıtqanda, turǵyndardyń ótinishin qanaǵattandyrý maqsatynda qolǵa alǵan jumys jalǵasady», deıdi Taraz qalasynyń ákimi Baqytjan Orynbekov.
Taraz qalasy ákimdiginiń baspasóz qyzmeti keltirgen derekke júginsek, «Avtobýs parki-2020» JShS arnaıy ákelgen «TEG» markaly sý jańa 16 avtobýs №55, №28 baǵyttarda qyzmet kórsetedi. Qoǵamdyq kóliktiń uzyndyǵy 9,5 metr bolsa, syıymdylyǵy 34 adamǵa shaqtalǵan. Seriktestik sońǵy ýaqytta avtobýstardy kórshiles Qytaı elinen ákele bastaǵan.
«Avtobýs parki-2020» JShS sońǵy ýaqytta qoǵamdyq kólikterdi jańartýǵa qatysty aýqymdy jumys atqaryp jatyr. Jergilikti atqarýshy bılik keltirgen málimetke júginsek, seriktestik buǵan deıin №11, №34, №38, №46, №54, №55, №60, №61 baǵyttarǵa qatynaıtyn qoǵamdyq kólikterdi 100 paıyz jańartqan bolatyn.
Oblys ortalyǵynda jolaýshylar kóligi tasymalyn jandandyrý, jetildirý, qala turǵyndaryn qoǵamdyq kólikpen tolyq qamtamasyz etý maqsatynda óńir basshysy Erbol Qarashókeev qala bıligine naqty tapsyrmalar júktegen.
Oblys ákiminiń tapsyrmasy aıasynda 2023 jyly qalaǵa 73 birlik jańa avtobýs jetkizilse, osy jyly sý jańa 133 avtobýs kelgen. Qala ákimdiginiń baspasóz qyzmeti keltirgen derekke sensek, jyl sońyna deıin qosymsha 42 qoǵamdyq kólikti jetkiziledi. Atqarylǵan jumystyń nátıjesinde osy jylǵa josparlanǵan 70 avtobýs alý jónindegi meje artyǵymen oryndalyp otyr.
TARAZ
