2681 bala oqıtyn aralas tilde bilim beretin orta mektep 1979 jyly 31 tamyzda ashylǵan. Mekteptiń ashylýyna sol kezdegi respýblıka basshysy, asa kórnekti memleket jáne qoǵam qaıratkeri Dinmuhamed Qonaev qatysqan. Pedagogıkalyq ujymnyń ótinishi negizinde Astana qalasy ákimdiginiń qaýlysymen 2001 jyly №16 orta mektepke Tólegen Aıbergenovtiń aty berilip, aqynnyń memorıaldyq mýzeıi ashyldy. Oqýshylarǵa sapaly bilim berip júrgen muǵalimderdiń kópshiligi – tájirıbeli mamandar, attestattaýdan ótken pedagogter. Mektep dırektory – Sáýle Ázimhanova. Bilikti basshynyń iskerligi arqasynda bilim mekemesi jańaryp, jańǵyrý ústinde ekenin baıqadyq.
Aqyn mýzeıi 2007 jyldan bastap jumys isteıdi. Ony ashýǵa mekteptiń tárbıe isi jónindegi orynbasary Aqbota Esamatova kóp eńbek sińirdi. Sondaı-aq poezııa janashyry, Mádenıet qaıratkeri Ospan Súleımenuly da zor úles qosty. 2018 jyly elordada ótken mektep mýzeıleri arasyndaǵy baıqaýda T.Aıbergenovke arnalǵan mektep mýzeıi bas júldeni jeńip alǵan.
«Aqyn shyǵarmashylyǵyn nasıhattaý barysynda kóptegen is-shara ótkizdik. Máselen, aqynnyń mereıtoıy kezinde konferensııa uıymdastyryp, ol jaıynda jazylǵan esseler baıqaýynyń jınaǵyn shyǵardyq. Sondaı-aq T.Aıbergenovke arnalǵan jyr keshi men tárbıe saǵatyn turaqty ótkizip otyramyz», dedi mýzeı jetekshisi Gaýhar Júsipova.
Mýzeıde aqynnyń otbasy bergen qundy jádigerler – qol saǵaty men qoldanǵan ydys-aıaqtary jáne ózi tutynǵan quraldary qoıylǵan. Eksponattar óte talǵammen jasaqtalǵan. Birinshi qatarda ózi ómirde aıryqsha qurmettegen, erekshe taǵdyr ıesi Jibek ana men Aqtóbege arnalǵan stend ornalasqan. Odan keıin týyp-ósken jeri Qaraqalpaq eliniń Qońyrat aýdany men apalarynyń fotolary, olarǵa arnalǵan «Apalarym» óleńi tur.
Tólegenniń poezııasy týraly jazýshy Ábish Kekilbaev: «Tólegen Aıbergenov shyǵarmashylyǵy – ólimdi jeńip shyqqan ómir shattyǵynyń jyry», dep baǵa bergen. Jıyrmadan endi ǵana asqan shaǵynda qazaq poezııasynyń tórinde jarq ete qalǵan aqyndy ádebı orta birden moıyndady. Ábdildá Tájibaev aqynnyń óleńderine alǵash alǵysóz jazyp, baspasóz betine jarııalaıdy. Qazir Tólegen Aıbergenov atyndaǵy ádebı syılyq bar. Aqynnyń «Saǵynbaı barsań taýlar da seniń, aldyńnan shyqpas asqaqtap» degen óleń joldary ómirge ózgeshe qyrynan qaraýǵa úıretedi.
Saltanatty is-shara kezinde kesh qonaqtary Tólegen Aıbergenovtiń mýzeıine saıahat jasap, mektep dálizinde qoıylǵan «STEM – barlyǵy úshin» ınnovasııalyq jobalar kórmesimen tanysty. Shyǵarmashyl balalardyń jel dıirmeni, sýqoımasyna arnalǵan jobalary óte qyzǵylyqty, áserli boldy. Bolashaqta ǵylymǵa jańalyq ákeletin ǵalymdar shyǵaryna shyn kóńilimizben sendik, sendik te, oqýshylardyń qyzyqty jobalarymen etene tanystyq. Qatysýshylar qyzdarǵa arnalǵan zamanaýı jabdyqtalǵan Tehnologııa kabınetiniń ashylý rásiminde bolyp, mekteptegi ánshi, megajuldyz Dımash Qudaıbergenniń esimi berilgen Mýzyka kabınetiniń ashylý saltanatyna qatysty. Dımashtyń ájesi Mıýa Nızamýtdınova, anasy Svetlana Aıtbaeva, Astanadaǵy Mýzykalyq jas kórermender teatrynyń dırektory Ashat Maemırov, taǵy basqa óner maıtalmandary qatysyp, úlkender shashý shashyp, óner qaıratkerleri izgi tilekterin bildirdi. Aqynnyń qyzdary Mahabbat pen Aınar Aıbergenovalar tolǵana tilek aıtyp, Aınar Tólegenqyzy aqyn óleńin tebirene oqyp berdi. Elordalyq Mýzykalyq jas kórermen teatrynyń akterleri aqyn óleńderin mánerlep oqyp, ánin shyrqady.
Gúlshat SAPARQYZY,
jýrnalıst
