Sybaılas jemqorlyqqa qarsy is-qımyl agenttiginiń óńirlik departamenti eriktilermen birge bıýdjet qarajatyna baqylaý júrgizip keledi. Jyl basynan Pavlodar oblysynda tıimsiz maqsatta jumsalmaq bolǵan 2,6 mlrd teńge saqtalyp qaldy. Departamenttiń qoǵamdyq bastamalaryna qolushyn berip otyrǵan 90-nan asa adam bar. Eriktilerdiń qataryna kez kelgen adam kire alady.
– Biz eriktilerge memlekettik satyp alýlardyń biryńǵaı júıesimen qalaı jumys isteý kerektigin úıretemiz. Odan ári eriktiler óz betterimen konkýrstarǵa monıtorıng júrgizip, baǵa negizsiz kóterilgen jaǵdaıda bizge habar túsiredi. Al departament óz kezeginde tıisti organdarǵa satyp alýdy uıymdastyrýshylar týraly hat jóneltedi. Tek eriktilerdiń kúsh-jigeriniń nátıjesinde, 308 mln teńge bıýdjet qarajatynyń negizsiz jumsalýynyń aldyn aldyq, – deıdi Sybaılas jemqorlyqqa qarsy is-qımyl agenttiginiń Pavlodar oblysy boıynsha departamentiniń basshysy Medet Amralınov.
Máselen, Pavlodardaǵy áýejaı arnaıy tehnıka satyp alýǵa memlekettik satyp alý konkýrsyn jarııalaǵan. Memlekettik satyp alýlar portalynda kórsetilgen baǵany eriktiler negizsiz ósirilgen degen qorytyndyǵa kelipti. Nátıjesinde, bul satyp alýlardan 40 mln teńgedeı únemdelgen.
Al Qarjylyq monıtorıng agenttigi Pavlodar oblysynyń mektepke deıingi mekemelerinde áleýmettik mańyzǵa ıe taýarlardyń baǵasyn negizsiz qymbattatý faktileriniń jolyn kesti. Júrgizilgen monıtorıng barysynda óńirdegi 158 mektepke deıingi mekemeniń 108-ine bir JShS negizgi jetkizýshi bolǵany anyqtaldy. Álgi mekemelerge azyq ónimderi ádettegi baǵadan 300 paıyz qymbatqa jetkizilip turǵan.
– Mektepke deıingi mekemelermen (balabaqshalarmen) jasalǵan sharttarda óndirýshi zaýytynan alǵan baǵadan áleýmettik mańyzǵa ıe taýarlardyń (ÁMAT) túpkilikti tutynýshysyna deıingi baǵa aıyrmashylyǵy kelesideı bolǵan: kúnbaǵys maıy – 286 paıyz ústemaqymen (453 tg/l-den 1 300 tg/l deıin), qaraqumyq jarmasy – 150 paıyz (240 tg/kg-nan 600 tg/kg deıin), qant – 93 paıyz (325 tg/kg-nan 630 tg/kg deıin), taýyq jumyrtqasy – 79 paıyz (430 tg/ond-tan 770 tg/ond deıin), tuz – 66 paıyz (60 tg/kg-nan 100 tg/kg deıin), kúrish – 36 paıyz (490 tg/kg-nan 670 tg/kg deıin), sary maı – 22 paıyz (2075 tg/kg-nan 2550 tg/kg deıin). Agenttik qabyldaǵan sharalardyń nátıjesinde atalǵan seriktestik ákimshilik jaýapkershilikke tartylyp, jetkizýshimen jasalǵan sharttar kúshin joıdy. Qazirgi ýaqytta mektepke deıingi mekemelerde ÁMAT jetkizý sharttary qaıta qaralyp, jańa kelisimsharttar jasasý máselesi qaralyp jatyr. Osylaısha únemdelgen qarajat somasy 30 mln teńgeni qurady, – dep habarlady Qarjylyq monıtorıng agenttigi.
ÁMAT taýarlaryna baǵa belgileýdiń deldaldyq shemalaryn tergeý jónindegi óńirlik komıssııalar sheńberinde agenttik bıýdjettik uıymdarǵa jetkiziletin azyq-túlik baǵasyna júıeli túrde monıtorıng júrgizip otyr.
Buǵan qosa jaqynda Pavlodardaǵy tústi metallýrgııa kolledjiniń burynǵy basshysy qyzmet babyn paıdalanyp bıýdjetke jalpy somasy 130 mln teńge materıaldyq shyǵyn keltirgeni anyqtaldy. Ol 2013-2023 jyldar aralyǵynda tústi metallýrgııa joǵary kolledjiniń basshysy qyzmetinde júrip, qazynadan qyp sýyrǵan. Iаǵnı jalǵan qyzmetkerlerdiń esepshotyna aı saıyn belgili kólemde jalaqy tólemderin júrgizip, ony ózi ıemdenip kelgen. Ádeıi burmalanǵan málimetteri bar jumys ýaqytyn esepke alý paraqtaryna qol qoıǵan. Sot onyń barlyq aqshalaı qarajattaryn tárkilep, 7 jylǵa bas bostandyǵynan aıyrdy.
Pavlodar oblysy
