Ol – elimizdegi áıelder arasynan shyqqan alǵashqy pedagogıka ǵylymdarynyń doktory, akademık. Mazmundy is-shara aıasynda «Qazaqstandaǵy bilim salasynda áıelderdiń róli» atty taqyrypta konferensııa ótip, onda ǵalymnyń ǵıbratty ómiri men ǵylymı qyzmeti jaıynda baıandama oqyldy.
– Bul kisi meniń ǵylymı jetekshim boldy. Uzaq ýaqyt janynda júrip, kóp tálim-tárbıe aldym. Bilimmen sýsyndadym. Ǵylymnyń qyr-syryn meńgerdim. Aıaýly ustazymnyń adamı bolmysyna únemi tántimin. Bizdi tek maman retinde ǵana emes, tulǵa retinde qalyptasýymyzǵa yqpalyn tıgizdi. Qazir biz sol kisi salǵan izben shákirt tárbıelep júrmiz. Kúlásh Qunantaıqyzy – meniń ǵylymdaǵy anam. Búginge deıin qol jetkizgen jetistigime onyń qosqan úlesi mol. Ardaqty ǵalymnyń eńbegin elep, esimin ulyqtaǵan ýnıversıtet basshylyǵyna rızashylyǵymdy bildiremin, – dedi L.N.Gýmılev atyndaǵy Eýrazııa ulttyq ýnıversıtetiniń professory, pedagogıka ǵylymdarynyń doktory Perızat Seıitqazy.
Qazaq ulttyq qyzdar pedagogıkalyq ýnıversıtetiniń rektory Gúlmıra Qanaı ǵalymnyń qazaq qyzdarynyń joǵary bilim alýyna sińirgen eńbegine toqtaldy.
«Kúlásh Qunantaıqyzy Qyzdar pedagogıkalyq ınstıtýtyn 16 jyl basqardy. Qazaq qyzdarynyń jan-jaqty bilim alýyna, ǵylymmen aınalysýyna uıytqy boldy. Ǵalymnyń kózi tirisinde 400-den asa oqý quraly men oqýlyqtar jáne monografııalary jaryq kórdi. Kúlásh Qunantaıqyzynyń jetekshiligimen birneshe ǵylym kandıdaty men doktorlar daıyndaldy. Búgingi kúnde de «Qunantaıqyzynyń ǵylymı mektebi» jas mamandar daıarlaý isinde jalǵasyn taýyp keledi», dedi ol.
Is-shara sońynda jekemenshik medısınalyq ortalyq atynan 4 stýdentke 3 mıllıon teńge kóleminde Kúlásh Qunantaıqyzy atyndaǵy grant berilip, ustaz eńbekteri qoıylǵan kórme uıymdastyryldy.
ALMATY
