foto ashyq derekóz
«Zamanaýı kitaphana – bul tek oqý keńistigi ǵana emes, sonymen qatar jastardy áleýmettendirý, beıimdeý jáne ıntellektýaldy damytý ortalyǵy. Bul úderiste kitaphana isi qyzmetkerleri mańyzdy ról atqarady.
Búgin – kitaphanashylar kúni. Jańa tehnologııalar zamanynda da kitap adamnyń oı-órisine tereń yqpal jasap, rýhanı azyq beredi. Kitaphana qyzmetkerleri elimizdegi bilim men mádenıettiń damýyna ólsheýsiz úles qosyp jatyr.
Mınıstrlik ózekti álemniń talaptaryna sáıkes keletin kitaphana isiniń qazirgi zamanǵy kadrlaryn daıarlaýǵa erekshe mán berip otyr. Sondaı-aq vedomstvo joǵary oqý oryndarynyń kitaphanalaryn jańǵyrtý boıynsha belsendi jumys jasap jatyr. Onyń jarqyn mysaly – Jubanov ýnıversıtetiniń kitaphanasy.
«Kitaphana isi, aqparatty óńdeý jáne muraǵat isi» bilim berý baǵdarlamalary boıynsha kadrlar daıarlaý elimizdiń 12 joǵary oqý ornynda júzege asyrylady. Memlekettik bilim berý tapsyrysy jyl saıyn artyp keledi. 2024-2025 oqý jylynda «Kitaphana isi» boıynsha 150 grant bólindi.
Joǵary oqý oryndary 24 bilim berý baǵdarlamasyn engizdi, onyń ishinde bakalavrıat, magıstratýra jáne doktorantýra bar. «Kitaphana isi», «Kitaphanalyq pedagogıkalyq qyzmet» jáne «Muraǵattaný» sııaqty jańa baǵdarlamalar qoǵamnyń sıfrlandyrý jaǵdaıynda aqparatty izdeý, óńdeý jáne taratýdyń zamanaýı ádisterin meńgerýge baǵyttalǵan. Sondaı-aq 2024 jylǵy tamyzda M.О́temisov atyndaǵy BQÝ «Tehnopedagogıkalyq kitaphana qyzmeti» atty jańa baǵdarlama ázirledi. Bul baǵdarlama mektep, balalar men jasóspirimdermen jumys jasaýǵa, pedagogıkalyq qyzmetter kórsetýge qabiletti kadrlardy daıarlaýǵa baǵyttalǵan.
Sondaı-aq mınıstrlik pen joǵary oqý oryndarynyń kitaphanalar qaýymdastyǵy arasyndaǵy memorandýmǵa qol qoıyldy, bul mamandardy daıarlaý standarttaryn jáne kitaphanalar usynatyn qyzmetterdi jaqsartýǵa múmkindik beredi. Mınıstrlik kitaphana salasy men qyzmetkerleriniń qajettilikterin eskere otyryp, qaýymdastyqpen tyǵyz jumys isteıdi, bul jastarǵa zamanaýı keńistik qurýǵa kómektesedi.
Qurmetti kitaphana qyzmetkerleri, sizderdiń kásibı qyzmetterińiz – joǵary oqý oryndarynyń aqparattyq-kitaphanalyq qyzmet kórsetý sapasynyń kepili. Bilimge degen adaldyqtaryńyz ben eńbekqorlyqtaryńyz úshin alǵysymyzdy bildiremiz», dep jazylǵan quttyqtaý hatynda.
