Memlekettik syılyqty ádiletti Qazaqstannyń kóshbasshysynyń qolynan alǵanyma da bek qýanyshtymyn. Alda elimizdiń adamzattyq órkenıetke óziniń ulttyq bolmysymen, salt-dástúrimen, rýhanı jıhazymen jetkenin qalaımyn. Sol kúni halqymmen birge shyndap qýanatyn bolýym kerek. Ata-babalarymyz qıyn da kúrdeli joldy júrip ótti. Táýelsizdiktiń 30 jyldyǵy bizge de ońaı bolmady. Qatelikten sabaq ala júrip jetilip kelemiz. Taǵdyr aıamaǵan ult perzentiniń qýanyshy tolyq qýanysh bola ala ma? Memlekettik syılyq sharasynyń minberinde turyp búgingi jamıǵatqa endigi jańa ýaqyt, jańa qazaq qoǵamy adaspasa eken dep tiledim. Jańarǵan qazaqtyń tegeýrindi urpaǵy baqyt besiginde jasasa eken!
Memlekettik syılyqty alǵan eńbegimdi jalǵastyryp, endi «Adamnyń bar qyzyǵy bala degen» atty balalar ádebıetiniń bary men nárin, keńshiligi men joǵyn túgendeıtin taǵy bir kitapty aıaqtaýǵa jaqyndadym.
Búgingi Respýblıka kúnine kelsek, bul kún – bizdiń baladan danaǵa deıin, buqara halyqtan bılik basyndaǵylarǵa deıin tereń tanym turǵysynan túsinip, jan-júregimizben qabyldap, shyn qýanatyn naǵyz ulttyq mereke. Ultymyzdyń, memleketimizdiń taǵdyry sheshilgen shýaqty kún. Aspandy bult torlap, jer-kókti tuman alsa, keıin aspan ashylǵanda adam balasynyń da kóńil kúıi kóterilip, bir jasap qalmaı ma? Odan da zor qýanysh – osy kún. Sondyqtan Respýblıka kúni qazir de, bolashaqta da táýelsizdigimizdiń aıbary bolady dep sanaımyn.
Qulbek ERGО́BEK,
Abaı atyndaǵy Memlekettik syılyqtyń laýreaty, ádebıet synshysy
