Pikir • 25 Qazan, 2024

Kózime jas keldi...

280 ret

kórsetildi

2 mın

oqý úshin

О́z mánin qaıta tapqan Respýblıka kúni merekesiniń óner adamdaryna berip jatqan yrzyq-nesibesi, qýanyshy mol. Bizdiń erkelep, osylaı mereıimiz tasyp, «Halyq ártisi» atanyp jatqanymyz da eń áýeli osy eldigimizdiń arqasy bolsa, ekinshiden, ónerimizdi baǵalap, tóbesine kóterip, búginge deıin qoshemetin aıamaı kele jatqan halqymyzdyń, patsha kóńildi kórermenderimizdiń rııasyz peıil-tileýiniń arqasy dep bilemin. Bul qurmetti ataqqa menen buryn sol janashyrlarym qatty qýanǵan sııaqty. Kóshede kórip qalǵan adamdardyń ózi tanyp, qutty bolsyn aıtyp jatyr. Tanysaq ta, tanymasaq ta qushaqtasyp, kesheden beri máre-sáre kúıdemiz. Munyń barlyǵy kóńildi erekshe tolqytady eken, kózime jas keldi. «Osy ýaqytqa deıin óner jolynda beker júrmegen ekenbiz, eńbegimiz esh ketpepti» dep shúkirshilik ettim.

Egemen Qazaqstan

Sýret: instagram.com/didarkadenkz

Árıne, memleketimizdiń qoldaýynyń arqasynda búginge deıin ataq pen marapattan kende bolǵan joqpyz. Dese de Halyq ártisi retinde resmı moıyndalýdyń qýanyshy bólek eken. Aıtýly ataqtan baıyp, asyp-tasyp ketpesimiz anyq. Biraq kóńildiń aspandap, qııanǵa shyqqany ras. Bul – meniń urpaǵyma, kórermenderime qýanysh. Meni alǵa qaraı jyljýǵa, ónerge ári qaraı da qaltqysyz qyzmet etýge jeteleı beretin jańa bir serpilis bolǵany anyq.

Ártis degen halyq óte ásershil keledi. Osy qurmetke ıe bola almaı armanda ketken qanshama talantty akterlerimiz bar. Shyn máninde adamnyń kóziniń tirisinde eńbeginiń baǵalanǵanyna ne jetsin! Sondyqtan da Allaǵa myń da bir táýbe deımin. Uzaq jyldan beri úzilip qalǵan ataqty qaıta jańǵyrtqany, qalpyna keltirgeni, eldigimizdi eńseli ete túskeni úshin Prezıdentimiz Qasym-Jomart Toqaevqa zor alǵysymdy jetkizemin. Táýelsizdigimiz tuǵyrly, urpaǵymyz ǵumyrly bolǵaı. Ult óneri máńgi jasaı bersin!

Lıdııa KÁDEN,

Qazaqstannyń halyq ártisi