Is-sharada sóz alǵan mınıstr Ǵ.Beısembaev áýeli barsha qatysýshyny, elimizdiń pedagogterin ulttyq merekemen quttyqtap, sala qyzmetkerleriniń jumysyna jemis, eńbegine tabys tiledi. Osyǵan qosa mınıstr qoǵamdaǵy ustaz róliniń mańyzyn atap ótti. Onyń aıtýynsha, jyl saıyn elimizdiń pedagogteri halyqaralyq deńgeıde joǵary kórsetkishterge qol jetkizip júr. Mysaly, bıyl bizdiń oqýshylar álemdik bedeldi pándik olımpıadalarda 26 (sol júldelerdiń ekeýi – altyn) medal jeńip aldy, al bul – muǵalimderdiń eńbegi.
«Prezıdent Qasym-Jomart Toqaev pedagogterdiń birinshi sezinde «Ult kelbeti – ustaz, ustaz qandaı bolsa, memleket sondaı bolady» degen qanatty sózdi alǵa tartty. Tórt jyldyń ishinde muǵalimderdiń aılyǵy 100 paıyzǵa ósti. Álemdegi eń bedeldi 7 halyqaralyq pándik olımpıada jeńimpazdaryn daıyndaǵan ustazdarǵa qomaqty syıaqy da qarastyryldy. Al 2012 jyldan bastap ótkizilip kele jatqan «Úzdik pedagog» baıqaýynyń jeńimpazdaryna 1000 aılyq eseptik kórsetkish (3,6 mln teńgeden asa) kóleminde syıaqy taǵaıyndalǵan. Bul qoldaýlardyń barlyǵy ustazdardyń el ıgiligine, adam kapıtalyn qalyptastyrýǵa jáne óskeleń urpaqty tárbıeleýge qosqan ólsheýsiz adal eńbeginiń memleket tarapynan laıyqty baǵalanatynyn jáne pedagog mártebesin kóterýdiń jańa kezeńin aıǵaqtaıdy. Sapaly bilim – memleketimizdiń tabysty bolashaǵynyń negizi. Biz, ustazdar, elimizdiń oń ımıdjin nasıhattaıtyn, sanaly da tolerantty zamanaýı urpaq qalyptastyrýdyń qozǵaýshy kúshine aınalýǵa tıispiz», dedi Ǵ.Beısembaev.
Jaýapty mınıstrlikke qarasty Orta bilim komıtetiniń tóraǵasy Qanybek Jumashev keıingi kezde «Úzdik pedagog» baıqaýyna qyzyǵýshylyqtyń artqanyn aıtty.
«Úzdik pedagog» baıqaýyna keıingi kezde qyzyǵýshylyq artqan. Qatysýshylar arasynda pedagog-sheber, pedagog-zertteýshi sekildi eń joǵary sanaty bar mamandardy kóp kezdestiremiz. Bıyl 1 700-den asa qatysýshy baq synap, 64 adam jeńimpaz atanyp otyr, keı óńirlerden 4 adamnan, keıbir oblystardan 1 adamnan daralanyp shyqty. Qomaqty syıaqysy bar mundaı baıqaý pedagogterdi yntalandyryp, jumysyna degen qulshynysyn arttyra túsedi», dedi Q.Jumashev.
Komıtet basshysynyń aıtýyna qaraǵanda, atalǵan baıqaýdy ótkizýdiń ashyqtyǵy men ádildigin qamtamasyz etý maqsatynda arnaýly platforma jasalǵan. Qatysýshylar sol platformada qajetti qujattaryn, jetistikterin derek retinde toltyryp, ózderiniń jumys ornynan arnaıy bir ruqsat almaı-aq óz erkimen ótinim bere alady. Baıqaýǵa balabaqsha, mektep, kolledj, arnaıy bilim, qosymsha bilim qyzmetkerleri de qatysady. Saıys áýeli aýdandyq, sodan soń oblystyq deńgeıde ótip, óńirde oza shapqandar respýblıkalyq deńgeıge ótip, iriktelgenderi Astanaǵa kelip táýelsiz sarapshylar aldynda ashyq sabaq ótkizedi. Baıqaý aıasynda ár qatysýshynyń bilim salasyn damytýǵa qosqan úlesi, pedagog qyzmetiniń tıimdiligi, onyń kásibı sheberligi eskeriledi. Respýblıkalyq baıqaý komıssııanyń quramyna úkimettik emes uıym, ata-analar qoǵamynyń, Bilim jáne ǵylym qyzmetkerleriniń Qazaqstan salalyq kásipodaǵynyń ókilderi, jýrnalıster, belsendi pedagogter kiredi.
Gúlnar Jalǵasqyzy bıylǵy «Úzdik pedagog» baıqaýynyń jeńimpazy atandy. Ol Aqtóbe oblysy Sh.Bersıev atyndaǵy Joǵary agrarlyq-tehnıkalyq kolledjiniń arnaıy pán oqytýshysy bolyp jumys isteıdi. 22 jyl eńbek ótili bar pedagog saıys kezinde qıyndyq bolǵanyn, sodan súrinbeýge ujymynyń senimi sep bolǵanyn aıtady.
«Jastarǵa sapaly bilim berýde aıanbaı eńbek etip kele jatqanymdy úlken abyroı sanaımyn. Bul baıqaýǵa birinshi ret qatystym, sóz joq, qıyndyq boldy. Biraq eńbegimniń elenip, jumysymnyń jemisin kórip otyrǵanym sol tókken terdiń nátıjesi dep bilemin. Bedeldi pedagogter dodasy qatysýshydan úzdik jumysty talap etedi, jetistikterdiń bolýy jetkiliksiz, munda oqýlyqtar jazý sekildi ǵylymı izdeniske basymdyq beriledi. Shyny kerek, «Úzdik pedagog» baıqaýynyń jyl saıyn ótip jatqanyn bilemin. Alaıda óz erkimmen qatysýǵa batpaı, ózimdi áli de damytyp, jumysymdy shıratýym kerek dep oılap júrdim. Ujymym úmit artyp, senim arqalatqandyqtan, beldi bekem býyp, báıgeni bermeýge tyrystym», deıdi G.Jalǵasqyzy.
Al Mereke Kenjebekova Jambyl oblysy Shý qalasynan kelip «Úzdik pedagog» atandy. Ol atalǵan qalada ornalasqan Sáken Seıfýllın atyndaǵy qazaq orta mektebinde bıologııa páninen sabaq beredi. 32 jyl boıy bilim salasynda taban aýdarmaı jumys istep kele jatqan pedagog.
«Oqýshylary jaqsy jetistikterimen bıikterden kórinse, adamı tulǵa retinde qalyptassa, muǵalim mıssııasynyń oryndalǵany, eń bastysy eńbeginiń óteýi, baǵalanǵany dep bilemin. Bul saıysqa eki jyl daıyndaldym. Jarystyń ereksheligi barlyq ózińizdiń jetistigińizdi berilgen qosymshalar boıynsha júıeli daıyndap otyrsańyz, saıtta jumystaryńyzǵa ádil baǵalanǵan upaılar ashyq shyǵyp turady. Otyz jyldan asa ýaqyt boıy halyqaralyq pán olımpıadalarynyń júldegerlerin, ǵylymı joba boıynsha úzdikterdi daıyndaǵan, osyǵan qosa on jyldan beri sheber-pedagog sanatymen ózimdi kórsete júrip, Ulttyq testileý ortalyǵynyń sarapshysy retinde atqarǵan eńbegim elenip, jaqynda muǵalimder kúninde Y.Altynsarın tósbelgisin ıelengen edim. Munyń bári bizdi yntalandyrady. Al baıqaýǵa jastardy shabyttandyryp, muǵalim mamandyǵyna qyzyǵýshylyǵyn arttyrý úshin qatystym. Bul jolda jetistiktiń shyńy – artyńnan iz qaldyryp, ózińnen keıingi áriptesterińdi janashyrlyqpen tárbıelegeniń, olarǵa jaqsy úlgi bola bilgeniń», dedi M.Kenjebekova.
Respýblıka kúnine arnalǵan saltanatty is-sharada oqý-aǵartý júıesiniń birqatar qyzmetkerlerine «Eren eńbegi úshin», «Eńbek ardageri» medalderi, «Y. Altynsarın», «Bilim berý isiniń qurmetti qyzmetkeri» tósbelgileri jáne basqa da mınıstrliktiń nagradalary tapsyryldy.
