Elmara Asqarqyzy Oral oblysynyń Jympıty aýylynda dúnıege kelgen. Taras Shevchenko atyndaǵy Orsk memlekettik pedagogıkalyq ınstıtýtynyń fılologııa fakýltetin bitirgen maman sodan beri orys tili men ádebıeti pániniń muǵalimi bolyp qyzmet etip keledi.
Bolashaq eńbek eri ustazdyq jolyn aýylda, Jympıty orta mektebinde bastaǵan. 2000 jyly Oral qalasyna aýysyp, áýeli №37 mektepte, keıin №5 mektepte qyzmet etti. Al 2007 jyldan búginge deıin Asan Taımanov atyndaǵy №34 mektep-gımnazııasynda orys tili men ádebıeti pániniń muǵalimi bolyp jumys istep keledi. «Pedagog-zertteýshi» dárejesine jetken ustazdyń jalpy pedagogıkalyq ótili – 34 jyl.
Elmara Asqarqyzy Qazaqstan Respýblıkasy fılologteriniń «Qazaqstanda fılologııalyq bilim berýdiń negizgi joldary» taqyrybynda ótken birinshi sezine delegat bolyp qatysty. Oblys kóleminde «Jas teatr kórermeni» ádebı drama úıirmesiniń baǵdarlamasyn qurastyrdy. Oblys kólemine 10-synyptarǵa arnalǵan «Pýshkınıana» qoldanbaly kýrsy is-tájirıbesi taratyldy.
Muǵalim Batys Qazaqstan oblysy men Oral qalasynda ótken pán olımıpıadalaryna, baıqaýlarǵa ádilqazy retinde qatysyp keledi. «Orys tili» men «Orys ádebıeti» oqýlyqtaryn taldaýǵa arnalǵan Ǵylymı Respýblıkalyq bilim berý ortalyǵynda eksperttik komıssııa múshesi. Oblystyq shyǵarmashylyq top quramynda 5-11 synyptarǵa arnalǵan orys tili men ádebıeti páninen taqyryptyq-kúntizbelik jospar qurastyrýda oblys muǵalimderine ádistemelik kómek kórsetedi.
Elmara Asqarqyzynyń oqýshylary jyl saıyn Oral qalalyq, Batys Qazaqstan oblystyq, tipti respýblıkalyq saıys, olımpıadalarda júldeger, jeńimpaz atanyp júr.
Atap aıtar bolsaq, 2019-2020 oqý jylynda respýblıkalyq ǵylymı joba saıysynda 11 synyp oqýshylary N.Ǵabdýlǵazızova men Z.Tólemisova qalalyq deńgeıdi – I oryn, oblystyq deńgeıde – II orynǵa ıe boldy. «Poezııa dýshı Pýshkına» atty mánerlep oqý saıysynda N.Ǵabdýlǵazızova respýblıkada jeńimpaz atandy. Esse baıqaýynda Z.Tólemisova respýblıkada II oryn aldy.
Budan bólek, respýblıkalyq «Teatrdyń ǵajaıyp álemi» konkýrsynda E.Traısova baptaǵan oqýshylar toby qalalyq deńgeıde de, oblystyq deńgeıde de I orynǵa ıe boldy. 10-synyp oqýshysy A.Nurlanuly «Úzdik er adam róli» ataǵyn ıelense, N.Ǵabdýlǵazızova «Úzdik akterlik oryndaýshy» ataǵymen marapattaldy.
Maqtaýly muǵalimniń shákirtteri halyqaralyq baıqaýlarda da bıikten kórinip júr. 2020-2021 oqý jylynda halyqaralyq orys tili pán olımpıadasynda G.Asqarova, M.Jantólına «Altyn sertıfıkatqa» ıe boldy.
Osyndaı júıeli jetistikteri úshin Elmara Asqarqyzynyń ózi 2016 jyly respýblıkanyń «Úzdik pedagogi» atanǵan bolatyn. Onyń esimi «Lýchshıe lıýdı, lýchshıe v obrazovanıı» atty halyqaralyq ensıklopedııa jınaǵyna engen.
«Elmara Asqarqyzy – bolashaqta da shyǵarmashylyq jumysyn tolyqtyryp, oqýshyny jeke tulǵa retinde qalyptastyrýǵa baryn salatyn jańashyl, izdenimpaz muǵalim», deıdi áriptesteri.
Baıqaǵanymyzdaı, Elmara Asqarqyzynyń shákirtteri teatr ónerin erekshe qadirleıdi. Bul oqýshynyń boıyna ustazdyń ulaǵatymen sińgen qubylys. О́tken 2022-2023 oqý jylynda ǵana E.Traısovanyń shákirti A.Islıam «Teatrdyń ǵajaıyp álemi» atty respýblıkalyq festıval-baıqaýynyń «Ekinshi plandaǵy úzdik ról» nomınasııasy boıynsha jeńimpaz atandy. Respýblıkalyq ǵylymı jobalar jarysyna qatysqan A.Aıbasova «Teatr ýj polon...» taqyrybynda qalalyq kezeńinde – I oryn, oblystyq kezeńde – II oryn alyp, respýblıkaǵa joldama jeńip aldy. Al 5-synyp oqýshylary S.Qılaý, A.Ismaǵulova, A.Bısenǵalıev, Z.Holmatova oblystyq «Tabıǵatty aıala» jas ólketanýshylar forýmynda «Ekoteatr» nomınasııasy boıynsha I oryn ıelendi. «Teatrdyń ǵajaıyp álemi» teatr óneriniń qalalyq festıval-baıqaýynda Asan Taımanov atyndaǵy №34 mektep-gımnazııasynyń «TIýZ» komandasy II oryn ıelendi.
«Teatrdy súıetin, ádebıetke qumar jas óren zııaly azamat bolyp qalyptasady. Eldiń bolashaǵy – osyndaı óreli jastar» deıdi Qazaqstannyń Eńbek Eri.
Batys Qazaqstan oblysy
