Foto: almaty.tv
Balalar arasynda mıopııa ıaǵnı, alystan kórmeýshilik jyldan-jylǵa artyp otyr. Statıstıkaǵa qaraǵanda elimizde árbir 5-shi bala alystan kórmeıdi. Oftalmologtar munyń sebebin kózge shekten tys salmaq túsirýmen baılanystyryp otyr, olar: «balalardyń kóz janaryn saqtaý úshin gadjetterdi qoldanýdy shekteý kerek», deıdi.
Almaty.tv.kz-tiń jazýynsha, kez kelgen adam gadjet, telefon, kompıýterdi paıdalanǵan soń, mindetti túrde kózge 20 mınýttaı demalys berýi kerek. Múmkindik bolsa, taza aýaǵa shyǵyp, 20 mınýttaı tynyqqan durys. Bul – kóz tamyrlarynyń bosańsýyna múmkindik beredi.
Dárigerler kóz aýrýyn asqyndyrýdyń saldary – sý qarańǵylyqqa ákeletinin, oǵan álemdik ozyq medısına qaýqarsyz ekenin eskertedi. Dúnıejúzilik densaýlyq saqtaý uıymynyń málimetinshe, álemde ár mınýt saıyn 1 bala, 5 sekýnd saıyn 1 eresek adam janaryn joǵaltady.
