Foto: Antıkor
Jıynǵa kólik mınıstri M. Qarabaev, joǵary aýdıtorlyq Palatanyń, Strategııalyq josparlaý, básekelestikti qorǵaý jáne damytý agenttikteriniń, qarjy, ónerkásip jáne sıfrlandyrý mınıstrlikteriniń, «Atameken» UKP, sondaı-aq jergilikti atqarýshy organdardyń ókilderi qatysty.
Keńeste jol salasyna qatysty jemqorlyq jaǵdaılaryna syrtqy taldaý júrgizildi.
Keıingi 5 jylda jol salasyna 6 trln teńgeden astam qarajat jumsalǵan. Dese de, jınalǵandar jol jelisiniń jaı-kúıine qatysty halyq tarapynan shaǵym jıi túsetinin atap ótti.
«Máselen, 2023-2024 jyldary memlekettik organdarǵa avtomobıl joldarynyń sapasyzdyǵyna qatysty 20 myńnan astam shaǵym túsken. Jurtshylyq muny jemqorlyqpen baılanystyrady. Osy jyldyń basynan beri ǵana Agenttik osy salada 24 qylmystyq isti tirkedi. Syrtqy taldaý josparlaýdan bastap baqylaý men kútip ustaýǵa deıingi jol qurylysy men jóndeýdiń barlyq kezeńderinde júıeli jemqorlyq táýekelderiniń bar ekenin kórsetti», delingen Agenttik habarlamasynda.
Sondaı-aq eldegi joldardyń sapasyz bolýyna qatysty sebepter taldandy. Salany damytý úshin Qazaqstandaǵy jol ǵylymı-zertteý ınstıtýtynyń áleýeti tolyq kólemde paıdalanylmaıtyny aıtyldy. Qoldanbaly ǵylymı zertteýler men ınnovasııalardy engizýdiń ornyna ınstıtýt normatıvtik qujattamany ázirleýmen aınalysyp otyrǵanyna nazar aýdaryldy.
Jol salý isinde jańa tehnologııalardy engizý kezinde baqylaýdyń bolmaýy, bilikti kadrlardyń jetispeýshiligi jáne kúrdeli normatıvtik-quqyqtyq baza da avtojoldardyń sapasyna keri áser etip otyr.
«Sıfrlandyrýdyń jetkiliksizdigi problemany ýshyqtyrady. Keıingi 10 jylda aqparattyq júıelerdi damytýǵa 16 mlrd bıýdjet qarajaty jumsaldy. Degenmen, joldardyń sıfrlyq kartasy áli ázirlenbegen. Taldaý qorytyndysy boıynsha Agenttik osy saladaǵy jemqorlyq táýekelderin joıý boıynsha 90-nan astam usynys daıyndady», delingen Agenttik habarlamasynda.
