Kórermender bul konsertten repertýarǵa jańadan engen bılerdi, qazaqtyń ulttyq jáne álem halyqtarynyń bı qoıylymdaryn, sonyń ishinde Azııa halyqtarynyń bılerin tamashalady. Ansambl «Mońǵol bıi», «Venzelıa», О́zbek bıi «Horezm termálári», «Kóńildi serýen», «Jastyq jalyn», Tájik bıi «Idona», Uıǵyr bıi «Dolan», Koreı bıi «Kalchým», Tatar bıi «Jenıhı», Qytaı bıi «Liming», «Jaryq», «El saltanaty», «Qyz qýý» syndy erekshe bı qoıylymdaryn usyndy. Sonymen qatar konsertte halyqaralyq jáne respýblıkalyq baıqaýlardyń laýreattary Birjan Aıtahmet, Asylhan Shalqarov ánnen shashý shashty. Táýelsizdiktiń tal besiginde terbelip, qyran qusy qalyqtaǵan kók aspanymyzdyń astynda «Mádenıet salasynyń úzdigi» Rahat Sársenov dombyranyń únin kókke áýeletse, aspapty janyna serik etken Aıgerim Elemesova óz ónerin pash etti.
Jańa baǵdarlamada álem halyqtarynyń bıleri jáne qazaqtyń ulttyq bıleri usynyldy. Keshke respýblıkalyq jáne halyqaralyq konkýrstyń laýreattary Birjan Aıtahmet, Asyljan Shalqarov jáne kesh júrgizýshisi Ádilet Rahymbaı qatysty. Kórkemdik jetekshisi – Qýanyshbek Tólegen.
Tarıhy tereń ujymnyń Respýblıka kúnine arnalǵan konsertine kelgen Astana qalasynyń turǵyndary men qonaqtary sheksiz qoshemet kórsetip, jyly lebizderin bildirdi. Sahnada talantty óner ujymyna Mádenıet jáne aqparat mınıstrliginiń jáne «Gúlder» ansambliniń atynan yqylas gúli tabystaldy.
Qazaq ónerinde saf ónerimen tanylyp, álemge ulttyq bıdi nasıhattap júrgen «Saltanat» memlekettik bı ansambli keler jyly 70 jyldyq mereıtoıyn atap ótpek. Osy ýaqyt ishinde qanshama daryndy jas, óner tarlandary ansambldiń aıaǵynan tik turyp, qalyptasýyna eńbek sińirdi. Qazirgi tańda jas býyn ókilderi de sol sara joldy ári qaraı jalǵap, qazaq óneriniń kókjıegin keńeıtýge atsalysyp júr.
«О́nerin súıip, ónerpazyn baǵalaǵan barsha patsha kóńil kórermenderge jáne konsertimizdi uıymdastyrýǵa qoldaý bildirgen, QR-nyń Mádenıet jáne aqparat mınıstrligine, Qalıbek Qýanyshbaev atyndaǵy Qazaq ulttyq mýzykalyq drama teatryna alǵys bildiremiz, aldaǵy ýaqytta da patsha kóńildi, talǵamy bıik kórermenderimizdi jańa shyǵarmalarmen, ásem bılermen, áýezdi áýen, tańdaýly mýzykamen tańǵaldyra beremiz», deıdi «Saltanat» memlekettik bı ansambliniń dırektory Elýbaı Kenjalıev.
Elýbaı Muhambetulynyń aıtýynsha, «Saltanat» memlekettik bı ansambli qazaqtyń tól óneri men ulttyq mádenıetin saqtap, halyqtyń rýhanı baılyǵyn damytyp, óskeleń urpaqqa ǵajaıyp bı óneri arqyly estetıkalyq tárbıe berip, jastardyn ulttyq sana sezimin qalyptastyrý jolynda aıanbaı óner kórsetip keledi. Qazaq bıin jańa taqyryptarmen, beınelermen baıytyp, sheńberin keńeıtti, ári qazirgi ulttyq sahnalyq bıdiń negizderin damytty. Búgingi tańda «Saltanat» memlekettik bı ansambli ulttyq horeografııa mádenıetiniń baı murasyn jáne álemdik horeografııanyń alýan túrligin tolyq nasıhattaı alatyn jalǵyz kásibı bı ujymy bolyp otyr.
Aty ańyzǵa aınalǵan ansambldiń 70 jylǵa jýyq ǵumyrynda ujym quramynda san myńdaǵan kásibı bilikti balet artısteriniń úlken shoǵyry eńbek etip, kóptegen jas artıster óz sheberlikterin shyńdady. Gastroldik saparmen Túrkııa, Reseı, Belgııa, Ońtústik Koreıa, AQSh, Fransııa elderine baryp, qazaq halqynyń ulttyq ónerin, dástúrin, halyq bıi men álem halyqtarynyń bılerin pash etti. Ústimizdegi jyl ansambl úshin jemisti boldy. 23 qyrkúıek kúni Reseı eliniń mádenı astanasy Sankt-Peterbýrg qalasynda «Baltııskıı dom» teatr-festıvaliniń sahnasynda túrli ult arasyndaǵy dostyq, birlik pen tatýlyqty nasıhattaıtyn konsertimiz joǵary deńgeıde ótti. Alpysqa jýyq óner sheberleri men balet artısteri qatysty.
Gúlshat SAPARQYZY
