Prezıdent Nursultan Nazarbaev Qazaqstan halqyna ant berdi

ASTANA. 29 sáýir. Búgin Astanadaǵy Táýelsizdik saraıynda qaıta saılanǵan Qazaqstan Prezıdenti Nursultan Nazarbaevty ulyqtaý rásimi ótti. Onda Elbasy Qazaqstan halqyna ant berdi. Bul týraly «QazAqparat» habarlady. Ulyqtaý rásimi ótetin saltanatty zalǵa aldymen Qazaqstan Respýblıkasynyń Týy, shtandarty jáne Konstıtýsııasy ákelindi. Budan keıin Elbasy Aqordadan shyqqan sátinen bastap, Táýelsizdik saraıyna deıin arnaıy saltanatty kortejben júrip ótti. Sonymen qatar, Zańǵa sáıkes, Respýblıka Prezıdenti Nursultan Nazarbaev Konstıtýsııaǵa qolyn qoıyp turyp: «Qazaqstan halqyna adal qyzmet etýge, Qazaqstan Respýblıkasynyń Konstıtýsııasy men zańdaryn qatań saqtaýǵa, azamattardyń quqyqtary men bostandyqtaryna kepildik berýge, Qazaqstan Respýblıkasy Prezıdentiniń ózime júktelgen mártebeli mindetin adal atqarýǵa saltanatty túrde ant etemin», – dep halyqqa ant berdi. Osy sátten bastap Prezıdent resmı qyzmetine kirisken bolyp sanalady. Respýblıka Prezıdenti anttyń mátinin memlekettik tilde aıtty. Ant berý saltanatty jaǵdaıda Parlament depýtattarynyń, Konstıtýsııalyq Keńes músheleriniń, Joǵarǵy Sot sýdıalarynyń, sondaı-aq, basqa da memlekettik organdar ókilderiniń qatysýymen ótti. Ant berilgennen keıin Qazaqstan Respýblıkasynyń Memlekettik Gımni oryndaldy. Sondaı-aq, Ortalyq saılaý komıssııasynyń tóraǵasy Prezıdentke Qazaqstan Respýblıkasy Prezıdentiniń kýáligin tapsyrdy. Elaman Qońyr. Derek: «QazAqparat». Sýret: egemen.kz.