Jyly júzben jaıdary qabyldaǵan sheneýnikke jumysynyń jaı-japsaryn jaıyp salyp, «siz-bizden shyj-byj artyq» ekenin biletin basy ústel ústine beli býylǵan býma teńgeni qoıǵan boldy.
Sheneýnik bunyń bul qylyǵyna:
– Para berip satyp almaqshysyń-á! Bár-bárin aqsha sheshedi dep oılaısyńdar! Jemqorlyq, korrýpsııa jaılaǵan zaman! – dep kózi shatynap zildene sóılegende, Aqalaq áı bitken jerim osy eken dep, búgilip, búgejektep qalǵan buǵan sheneýnik taqap kelgende tizesi dirildeı ornynan tura almaı qaldy... Jo-joq, jypylyqtaı sheneýnikke moıyn buryp edi, kókesi kúlimdep bunyń arqasynan qaǵyp, meıirli júzben qolyn qysty...
Usynylǵan jumsaq alaqan men kúlimkóz janardan Aqalaqtyń tize dirili sap tyıylyp edi, sheneýnik túregelgen qalpy:
– Túbimizge osy jetedi! – dep, paranyń kesir-kesapaty jóninde jóńkı jónelip, buǵan qarata aýyzynan aq ıt kirgizip, kók ıt shyǵaryp bulqan-talqan býsansyn kep... Sóıtti de, búgejekteı búrisip qalǵan bunyń eńsesin tiktep qushaǵyna qysty...
Keń de kerim kushaqtan bosanyp kórim bolyp tur edi, esik ashylyp, eńgezerdeı eki jigit kirip, bosaǵaǵa taltaıyp tura qalsyn...
Aqalaq alaqtap ornyna baryp jaıǵasqan kókesine qarap edi, qaharly qalpy:
– Para alýshydan buryn para berýshini tunshyqtyrǵan jón! – dep osy tóńirekte «tóre» sózin túıdek-túıdek tógiltip baryp esiktegi ekeýge ymdap edi, estııar óz adamdary eken. Birden lám-mımsiz sheneýnik nusqaǵan, mana Aqalaq usynǵan býma paketti lyp etkizip alyp shyǵa jóneldi.
Bul sátte Aqalaq «biraz jerge» baryp ta keldi... Kóz aldy buldyrlap, aldyna temir tor elestep, bitken jerim osy dep opyrylyp qalǵan Aqalaqty kókesi qoltyqtap turǵyzyp, qolyna is-qaǵazdaryn berip esikke deıin shyǵaryp saldy.
Bir sát Aqalaq óz-ózine kelip es jııa qolyndaǵy qaǵazdaryna kóz júgirtip edi... Qol da qoıylǵan, mór de basylǵan eken...
Berik SADYR
