Rasynda, О́zbekáli Jánibekov – qazaq úshin júrek maıyn sham qylǵan (S.Toraıǵyrov) arys. Tanymal jýrnalıst Talǵat Batyrhan «Egemen Qazaqstan» gazetiniń 2016 jylǵy 2 qyrkúıek kúngi sanynda jarııalanǵan «О́zaǵańnyń ónegesi» atty maqalasynda: «О́resi bıik О́zaǵań keshegi qylyshynan qan tamǵan keńestik kezeńniń ózinde ultqa qyzmet etýdiń úlken úlgisin kórsetti. Shekpendi sheneýnikter sherýiniń aldyńǵy shebinde júrse de, arttaǵy toptan adaspady. Totalıtarlyq júıeniń tolyp jatqan tosqaýyldaryna qaramaı halqynyń bary men joǵyn hattady. Tar zamannyń tasasynda kómeski tartqan eski qundylyqtarymyzdyń elesin izdedi. Sanǵasyrlyq salt-sanamyzdyń umyt qalǵan ustyndaryn jurtynyń esine salyp, jeti yqylymnan jetken altyn arqaýdyń úzilmeýine aıanbaı atsalysty. Babadan mıras baı mádenıetimizdiń mártebesin kóterdi. Tól tarıhymyzdyń tórt qubylasyn túgendeýdi asqaq muratyna aınaldyrdy. О́shkenimizdiń janyp, ólgenimizdiń tirilýine ólsheýsiz úles qosty. Sonyń arqasynda soıy bólek sańlaqtar sapynan oıyp otyryp oryn aldy. Qazaq rýhanııatynyń qabyrǵaly ókili retinde sońynda mol mura qaldyrdy», dep jazǵan eken. Budan asyryp aıtar sóz joq.
Osy oraıda, О́zaǵańnyń Torǵaı óńiri men onyń ortalyǵy Arqalyq qalasynyń ósip-órkendeýine sińirgen eńbegin aıtpaı ketýge bolmaıdy. Aǵamyz 1970 jyly jańadan Torǵaı oblysy qurylǵan qarasha aıynan bastap, oblystyq partııa komıtetiniń ıdeologııalyq hatshysy bolyp taǵaıyndalady. Bul qyzmetin 1975 jyly shilde aıynda Qazaqstan Kompartııasy OK syrtqy eldermen baılanys bóliminiń meńgerýshisi laýazymyna aýysqanǵa deıin abyroıly atqardy.
«О́zbekáli Jánibekovtiń Torǵaı óńirine, jalpy, ısi qazaqqa sińirgen eńbegi ushan-teńiz. Torǵaıdyń talantty jastarynyń basyn qosyp, tuńǵysh ret 1972 jyly qazaq drama teatryn, 1974 jyly «Sherter» ulttyq folklorlyq-etnografııalyq ansamblin jasaqtady, oblystyq «Dala ólkesi tarıhy» mýzeıin ashty» («Egemen Qazaqstan», 28 qyrkúıek, 2021 jyl) dep jazady «Egemenniń» osy óńirdegi tilshisi Nurqanat Qulabaı.
Osy oraıda, Almaty qalalyq memlekettik arhıv qorynda saqtaýly turǵan myna bir sýrettiń tarıhyna toqtalsaq: fotoda turǵan qazaqtyń arys azamattary – Ekinshi dúnıejúzilik soǵystyń erjúrek batyrlary hám Halyq qaharmandary – Qasym Qaısenov pen Rahymjan Qoshqarbaevtyń «Arqalyq qalasynyń qurmetti azamaty» atanǵan sáti. Sýrettiń túsirilgen ýaqyty «9 mamyr, 1975 jyl» dep jazylǵan.
Shyndyǵynda, osy jyly (1975) odaq kóleminde ulan-asyr atap ótilip jatqan uly Jeńistiń 30 jyldyq mereıtoıy men Arqalyq shaharynyń qala mártebesin alǵanynyń 10 jyldyq datasyna oraı qazaqtyń mańdaıyna basqan qos batyryn attaı qalap shaqyryp alyp, «qurmetti azamat» ataǵyn bergizgen adam – sol tustaǵy oblystyq partııa komıtetiniń ıdeologııalyq hatshysy О́zbekáli Jánibekov.
Qazirgi tańda qazaq qoǵamynda uly tulǵalardy ulyqtaý isinde óńirlik shekteý bar. Batys óńiri óz adamdaryn, shyǵys óz qaıratkerlerin, ońtústik óz týmalaryn nasıhattap álek. Bul jerde týǵan jer, ósken óńirine qaramaı kúlli ultqa ortaq arystardy áspetteý isin búgingi qoǵamǵa ortaq dúnıe retinde tanytý qajet-aq. Buǵan mundaǵy «О́zaǵańnyń ónegesi» úlgi.
